ກອງປະຊຸມລັດຖະມົນຕີການຕ່າງປະເທດຂອງບັນດາປະເທດອາຊຽນຈັດຂຶ້ນຢູ່ເກາະບາຫຼີ
(GMT+08:00) 2011-11-16 11:04:08 cri
ຕາມຂ່າວສານຊີນຮວາ: ວັນທີ15ພະຈິກນີ້, ກອງປະຊຸມລັດຖະມົນຕີວ່າການກະຊວງການຕ່າງປະເທດຂອງບັນດາປະເທດອາຊຽນໄດ້ຈັດຂຶ້ນຢູ່ເກາະບາຫຼີຂອງອິນໂດເນເຊຍ, ບັນດາລັດຖະມົນຕີໄດ້ປຶກສາຫາລືກັນຕື່ມອີກກ່ຽວກັບການຊຸກຍູ້ການສ້າງອາຊຽນເຊື່ອມໂຍງເຂົ້າເປັນອັນໜຶ່ງອັນດຽວກັນ,ສ້າງອົງການສັນຕິພາບແລະຄວາມປອງດອງກັນໃນອາຊຽນ ບັນຫາພາກພື້ນແລະສາກົນທີ່ມີຄວາມສົນໃຈນຳກັນ.
ປະກາດແຈ້ງຂ່າວທີ່ປະກາດຫຼັງກອງປະຊຸມກ່າວວ່າ, ລັດຖະມົນຕີການຕ່າງປະເທດທີ່ເຂົ້າຮ່ວມກອງປະຊຸມໄດ້ປຶກສາຫາລືກັນຕື່ມອີກກ່ຽວກັບການຊຸກຍູ້ການສ້າງປະຊາຄົມອາຊຽນແລະສະພາບການຈັດຕັ້ງປະຕິບັດ "ກົດບັດອາຊຽນ". ໃນເວລາກ່າວເຖິງບັນຫາການນຳໃຊ້ວິຊາລະບົບດຽວກັນຂອງອາຊຽນໃຫ້ແກ່ປະຊາຊົນຂອງບັນດາປະເທດນອກອາຊຽນ,ຜູ້ແທນທີ່ເຂົ້າຮ່ວມກອງປະຊຸມໄດ້ເຫັນດີເປັນເອກະສັນກັນກ່ຽວກັບການດຳເນີນການຄົ້ນຄວ້າຄວາມອາດເປັນໄປໄດ້ກ່ຽວກັບເລື່ອງນີ້,ເພື່ອເລັ່ງລັດຊຸກຍູ້ຂະບວນການນຳໃຊ້ວິຊາລະບົບດຽວກັນ.
ລັດຖະມົນຕີການຕ່າງປະເທດທີ່ເຂົ້າຮ່ວມກອງປະຊຸມຍັງໄດ້ເຫັນດີຕໍ່ການຍື່ນຂໍ້ສະເໜີທີ່ສ້າງຕັ້ງອົງການສັນຕິພາບແລະຄວາມປອງດອງກັນໃນອາຊຽນໃຫ້ແກ່ກອງປະຊຸມສຸດຍອດອາຊຽນ. ອົງການທີ່ມີຈຸດປະສົງເພື່ອແກ້ໄຂຄວາມຂັດແຍ່ງກັນພາຍໃນພາກພື້ນນີ້ຄາດວ່າຈະສ້າງຕັ້ງຂຶ້ນຢ່າງເປັນທາງການໃນປີ2012.
ນອກນີ້,ລັດຖະມົນຕີການຕ່າງປະເທດຍັງໄດ້ປຶກສາຫາລືກັນກ່ຽວກັບການປະຕິບັດ "ຖະແຫຼງການວ່າດ້ວຍການປະພຶດຂອງບັນດາຝ່າຍໃນທະເລຈີນໃຕ້",ການຊ່ວຍກູ້ໄພນ້ຳຖ້ວມແລະການຮ່ວມມືໃນພາກພື້ນຫຼັງການສ້າງສາຄືນໃໝ່, ເບຼຊິນສະເໜີເຂົ້າເປັນພາຄີໃນ "ສົນທິສັນຍາໄມຕີຈິດແລະຮ່ວມມືໃນພາກພື້ນຂອງອາຊີຕາເວັນອອກສຽງໃຕ້", ສະຖານະການຂອງແຫຼມເກົາຫຼີ,ບັນຫາຕາເວັນອອກກາງແລະບັນຫາພາກພື້ນແລະສາກົນອື່ນໆຕື່ມອີກ.
