ຈີນຄອງຄອຍຮ່ວມກັບຝ່າຍຕ່າງໆເພື່ອຊຸກຍູ້ການຮ່ວມມືແລະການພັດທະນາຂອງອາຊີຕາເວັນອອກ
(GMT+08:00) 2011-11-16 10:20:18 cri
ວັນທີ15ພະຈິກນີ້, ຢູ່ນະຄອນຫຼວງປັກກິ່ງ, ທ່ານຫຼິວເຈິ້ນໝິນ ຜູ້ຊ່ວຍລັດຖະມົນຕີວ່າການກະຊວງການຕ່າງປະເທດຈີນກ່າວວ່າ, ຈີນເຊື່ອວ່າ, ພາຍໃຕ້ຄວາມພະຍາຍາມຮ່ວມກັນຂອງຝ່າຍຕ່າງໆ, ບັນດາກອງປະຊຸມສຸດຍອດອາຊີຕາເວັນອອກທີ່ຈະໄຂຂຶ້ນໃນໄວໆນີ້ ຈະໄດ້ຜົນສຳເລັດອັນຕັ້ງໜ້າ, ແລະຊຸກຍູ້ການຮ່ວມມືໃນພາກພື້ນອາຊີຕາເວັນອອກຂະຫຍາຍຕົວຕື່ມອີກຕາມທິດຕ່າງຝ່າຍຕ່າງໄດ້ຮັບຜົນປະໂຫຍດ.
ວັນທີ18ຫາວັນທີ19ພະຈິກນີ້, ບັນດາກອງປະຊຸມສຸດຍອດອາຊີຕາເວັນອອກຈະໄຂຂຶ້ນຢູ່ເກາະບາຫຼີຂອງອິນໂດເນເຊຍ. ໂດຍຕອບສະໜອງຄຳເຊີນຂອງທ່ານຊູຊີໂລ ບຳບັງ ຢຸດໂຮໂຢໂນ ປະທານາທິບໍດີອິນໂດເນເຊຍ ປະເທດປະທານໝູນວຽນຂອງອາຊຽນ, ທ່ານເວີ່ນເຈຍປາວ ນາຍົກລັດຖະມົນຕີຈີນຈະນຳພາຄະນະຜູ້ແທນໄປເຂົ້າຮ່ວມກອງປະຊຸມ.
ໃນກອງປະຊຸມຖະແຫຼງຂ່າວທີ່ຈັດຂຶ້ນໃນວັນທີ15ພະຈິກນີ້, ທ່ານຫຼິວເຈິ້ນໝິນກ່າວວ່າ, ຈີນຈະໄປເຂົ້າຮ່ວມກອງປະຊຸມບົນຈິດໃຈທີ່ເພີ່ມຄວາມໄວ້ເນື້ອເຊື່ອໃຈກັນ, ລົງເລິກການຮ່ວມມືໃນພາກພື້ນ, ແລະຊຸກຍູ້ການຮ່ວມມືທີ່ຕ່າງຝ່າຍຕ່າງໄດ້ຮັບຜົນປະໂຫຍດ. ຈີນມີຄວາມຄອງຄອຍ3ຢ່າງຕໍ່ບັນດາກອງປະຊຸມສຸດຍອດອາຊີຕາເວັນອອກເທື່ອນີ້, ຄື: ເພີ່ມຄວາມສາມັກຄີກັນ, ລົງເລິກການຮ່ວມມືກັນແລະຊຸກຍູ້ກົນໄກຮ່ວມມືກັນໃນດ້ານຕ່າງໆໃຫ້ກ້າວໄປໜ້າຢ່າງບໍ່ຢຸດຢັ້ງ.
