ທ່ານເວີ່ນເຈຍປາວເດີນທາງໄປອິນໂດເນເຊຍເພື່ອເຂົ້າຮ່ວມບັນດາກອງປະຊຸມສຸດຍອດອາຊີຕາເວັນອອກ
(GMT+08:00) 2011-11-17 10:53:13 cri
ຕອນເຊົ້າວັນທີ17ພະຈິກນີ້, ທ່ານເວີ່ນເຈຍປາວ ນາຍົກລັດຖະມົນຕີຈີນໄດ້ເດີນທາງອອກຈາກປັກກິ່ງໄປເກາະບາຫຼີຂອງອິນໂດເນເຊຍ, ເພື່ອເຂົ້າຮ່ວມກອງປະຊຸມອາຊຽນກັບຈີນຄັ້ງທີ14 ກໍຄືກອງປະຊຸມສຸດຍອດລະລຶກຈີນອາຊຽນສ້າງການພົວພັນຄູ່ເຈລະຈາຄົບຮອບ20ປີ, ກອງປະຊຸມສຸດຍອດອາຊຽນກັບຈີນ, ຍີ່ປຸ່ນແລະສ.ເກົາຫຼີຄັ້ງທີ14, ກອງປະຊຸມສຸດຍອດອາຊີຕາເວັນອອກຄັ້ງທີ6ແລະການພົບປະລະຫວ່າງຜູ້ນຳຈີນ, ຍີ່ປຸ່ນແລະສ.ເກົາຫຼີ. ຫຼັງຈາກນັ້ນ, ທ່ານເວີ່ນເຈຍປາວຍັງຈະໄປຢ້ຽມຢາມບຼູໄນ.
ນີ້ເປັນຄັ້ງທີ8ແລ້ວທີ່ທ່ານເວີ່ນເຈຍປາວໄປເຂົ້າຮ່ວມບັນດາກອງປະຊຸມສຸດຍອດອາຊີຕາເວັນອອກ. ໃນໄລຍະປະຊຸມ, ທ່ານຍັງຈະໄດ້ພົບປະກັບຜູ້ນຳຫຼາຍປະເທດຕື່ມອີກ. ປີນີ້ແມ່ນຈີນອາຊຽນສ້າງການພົວພັນຄູ່ເຈລະຈາຄົບຮອບ20ປີ, ໃນກອງປະຊຸມ, ທ່ານເວີ່ນເຈຍປາວຈະມີຂໍ້ສະເໜີຕໍ່ການລົງເລິກການຮ່ວມມືໃນຂົງເຂດຕ່າງໆລະຫວ່າງສອງຝ່າຍ ເຊັ່ນ: ຂົງເຂດການເມືອງ, ເສດຖະກິດການຄ້າ, ການເຊື່ອມໂຍງເຂົ້າກັນ, ແລະຂົງເຂດສັງຄົມແລະວັດທະນະທຳເປັນຕົ້ນ. ກອງປະຊຸມຈະເປີດເຜີຍຖະແຫຼງການຮ່ວມ, ສະແດງໃຫ້ເຫັນຄວາມມຸ້ງມາດປາຖະໜາຂອງຈີນແລະອາຊຽນເພື່ອລົງເລິກການພົວພັນຄູ່ຮ່ວມມືຍຸດທະສາດ. ໃນກອງປະຊຸມສຸດຍອດອາຊີຕາເວັນອອກ, ທ່ານເວີ່ນເຈຍປາວຍັງຈະແລກປ່ຽນຄວາມເຫັນກັບບັນດາຝ່າຍກ່ຽວກັບບັນຫາຕ່າງໆ ເຊັ່ນ: ການພັດທະນາຂອງກອງປະຊຸມສຸດຍອດໃນອະນາຄົດ, ສະຖານະການພາກພື້ນແລະສາກົນແລະອື່ນໆ. ປີນີ້, ຣັດເຊຍແລະອາເມລິກາຈະເຂົ້າເປັນສະມາຊິກກອງປະຊຸມສຸດຍອດອາຊີຕາເວັນອອກຢ່າງເປັນທາງການ, ຈີນກ່າວວ່າ, ຍິນດີຕ້ອນຮັບແລະເຊື່ອວ່າ, ທັງສອງປະເທດຈະເສີມຂະຫຍາຍບົດບາດທີ່ມີລັກສະນະສ້າງສັນໃນການຊຸກຍູ້ການຮ່ວມມືໃນພາກພື້ນອາຊີຕາເວັນອອກ.
