ລັດຖະມົນຕີການຕ່າງປະເທດອິນໂດເນເຊຍກ່າວວ່າ: ແຜນການຂອງຟີລິບປິນຄວນເປັນເອກະພາບກັບເຂັມທິດຊີ້ນຳຂອງຖະແຫຼງການວ່າດ້ວຍການປະພຶດຂອງບັນດາຝ່າຍຢູ່ທະເລຈີນໃຕ້
(GMT+08:00) 2011-11-17 11:30:20 cri
ຕາມຂ່າວຈາກໜັງສືພິມເຢິນມິນຢື້ປ້າວຈີນລາຍງານວ່າ, ຫວ່າງມໍ່ໆມານີ້, ໂດຍແນໃສ່ຟີລິບປິນສະເໜີແຜນການສ້າງເຂດສັນຕິພາບ, ເສລີພາບ, ມິດຕະພາບແລະການຮ່ວມມືຢູ່ທະເລຈີນໃຕ້, ທ່ານມາຕີ ເນຕາລີກາວາ ລັດຖະມົນຕີວ່າການກະຊວງການຕ່າງປະເທດອິນໂດເນເຊຍກ່າວວ່າ, ແຜນການຂອງຟີລິບປິນຄວນເປັນເອກະພາບກັນກັບຖະແຫຼງການວ່າດ້ວຍການປະພຶດຂອງບັນດາຝ່າຍຢູ່ທະເລຈີນໃຕ້ ທີ່ອາຊຽນເຊັນກັບຈີນແລະເຂັມທິດຊີ້ນຳການປະພຶດຕາມຫຼັງທີ່ສອງຝ່າຍເຊັນກັນໃນເດືອນກໍລະກົດ.
ຕອນຄ່ຳວັນທີ16ພະຈິກນີ້, ທ່ານມາຕີກ່າວວ່າ, ໃນກອງປະຊຸມກະກຽມ, ລັດຖະມົນຕີການຕ່າງປະເທດຂອງບັນດາປະເທດອາຊຽນໄດ້ປຶກສາຫາລືກັນວ່າ, ຈະຊຸກຍູ້ການເຈລະຈາກັນ ເພື່ອສ້າງຫຼັກມາດຖານວ່າດ້ວຍການປະພຶດຢູ່ທະເລຈີນໃຕ້ ທີ່ມີຜົນບັງຄັບໃຊ້ທາງກົດໝາຍກວ່າຫຼືບໍ່, ພ້ອມກັນນັ້ນ, ກໍຫວັງຢາກໃຫ້ຈີນເຂົ້າຮ່ວມການປຶກສາຫາລືກັນດັ່ງກ່າວໂດຍໄວ. ທ່ານມາຕີກ່າວວ່າ, ອາຊຽນບໍ່ຢາກໃຫ້ພາກພື້ນອາຊີຕາເວັນອອກສຽງໃຕ້ ກາຍເປັນສະຖານທີ່ທີ່ປະເທດໃຫຍ່ຕ່າງໆແກ່ງແຍ່ງກັນ, ສະນັ້ນ, ຫວັງຢາກໃຫ້ມີຫຼັກມາດຖານວ່າດ້ວຍການປະພຶດຢູ່ທະເລຈີນໃຕ້ທີ່ມີຜົນບັງຄັບໃຊ້ທາງກົດໝາຍກວ່າ, ເພື່ອແກ້ໄຂບັນຫາພາຍໃຕ້ຂອບກົດໝາຍ.
