ຟີລິບປີນກັບອາເມລິກາເຊັນເອກະສານເພີ່ມທະວີການຮ່ວມມືກັນ
(GMT+08:00) 2011-11-17 11:45:47 cri
ຕາມຂ່າວສານຊິນຮວາ, ວັນທີ16ພະຈິກນີ້, ຢູ່ນະຄອນຫຼວງມານີລາ, ທ່ານນາງຮິວລາຣີ ຄຼິນຕັນ ລັດຖະມົນຕີວ່າການກະຊວງການຕ່າງປະເທດອາເມລິກາກັບທ່ານອານເບີດ ເດວ ໂຣຊາຣິກ ລັດຖະມົນຕີວ່າການກະຊວງການຕ່າງປະເທດຟີລິບປິນ ໄດ້ລົງນາມໃນຖະແຫຼງການຮ່ວມມານີລາ ແລະຖະແຫຼງການຮ່ວມກ່ຽວກັບຫຼັກການເພີ່ມທະວີການພົວພັນເພື່ອນຮ່ວກິດຈະການລະຫວ່າງຟີລິບປິນອາເມລິກາ ທີ່ມີວັດຖຸປະສົງເພີ່ມທະວີການພົວພັນລະຫວ່າງສອງປະເທດ.
ເນື້ອໃນຂອງຖະແຫຼງການມານີລາຂຽນວ່າ, ຟີລິບປິນແລະອາເມລິກາຕົກລົງສືບຕໍ່ຮ່ວມມືກັນເພື່ອຮັບມືກັບສິ່ງທ້າທາຍໃນພາກພື້ນແລະທົ່ວໂລກທີ່ກວ້າງຂວາງກວ່າເກົ່າ, ເຊິ່ງລວມທັງໄພຄຸກຄາມດ້ານຕ່າງໆ: ຄວາມປອດໄພເທິງທະເລແລະການປ່ຽນແປງຂອງດິນຟ້າອາກາດ, ການແຜ່ຜາຍອາວຸດນິວເຄຼຍ, ລັດທິກໍ່ການຮ້າຍແລະອາຊະຍາກຳຂ້າມຊາດ. ສອງຝ່າຍຍັງຈະດຳເນີນການຮ່ວມມືແໜ້ນແຟ້ນແລະບັງເກີດຜົນກວ່າເກົ່າໃນການຕໍ່ຕ້ານອົງການກໍ່ການຮ້າຍທີ່ມີສ່ວນກ່ຽວຂ້ອງກັບອົງການອານໄກດາ ທີ່ຢູ່ທາງພາກໃຕ້ຂອງຟີລິບປິນ.
ມື້ດຽວກັນ, ທ່ານເດວ ໂຣຊາຣິກ ກັບທ່ານນາງຮິວລານີຍັງໄດ້ເຊັນຖະແຫຼງການຮ່ວມກ່ຽວກັບຫຼັກການເພີ່ມທະວີການພົວພັນເພື່ອນຮ່ວມກິດຈະການລະຫວ່າງຟີລິບປິນກັບອາເມລິກາ. ຖະແຫຼງການຂຽນວ່າ, ຟີລິບປິນແລະອາເມລິກາຈະນຳໃຊ້ເຕັກນິກແລະຊັບພະຍາກອນຂອງລັດຖະບານສອງປະເທດ, ເຮັດໃຫ້ການພັດທະນາເສດຖະກິດຟີລິບປິນຫຼຸດພົ້ນອອກຈາກຄວາມຫຍຸ້ງຍາກ, ເຮັດໃຫ້ປະຊາຊົນຟີລິບປິນໄດ້ຮັບຜົນປະໂຫຍດຈາກການປ່ຽນແປງທາງເສດຖະກິດ. ຖະແຫຼງການຂຽນວ່າ, ອາເມລິກາໄດ້ຮຽກຮ້ອງໃຫ້15ພາກສ່ວນຂອງລັດຖະບານອາເມລິກາດຳເນີນການຮ່ວມມືກັບລັດຖະບານຟີລິບປິນຢ່າງຕັ້ງໜ້າ.
ໃນໄລຍະທ່ານນາງຮິວລາຣີໄປຢ້ຽມຢາມຟີລິບປິນ, ປະຊາຊົນນະຄອນຫຼວງມານີລາໄດ້ເດີນຂະບວນປະທ້ວງຢູ່ຕາມຖະໜົນຫົນທາງຢ່າງຫຼວງຫຼາຍ, ທວງໃຫ້ທະຫານອາເມລິກາຖອນອອກຈາກຟີລິບປິນແລະຍົກເລີກສັນຍາປ້ອງກັນລະຫວ່າງສອງປະເທດ. ຢູ່ຕໍ່ໜ້າປະຕູສະຖານທູດອາເມລິກາປະຈຳຟີລິບປິນ, ຜູ້ປະທ້ວງໄດ້ເຜົາທຸງຊາດອາເມລິກາທີ່ເຮັດຂຶ້ນມາເອງ.
