ຕາມຂ່າວcri: ວັນທີ17ພະຈິກນີ້, ກອງປະຊຸມສຸດຍອດອາຊຽນຄັ້ງທີ19ໄດ້ຮັບຮອງຜ່ານ "ຖະແຫຼງການຮ່ວມບາຫຼີປະຊາຄົມອາຊຽນໃນປະຊາຄົມຂອງບັນດາປະເທດຂອງໂລກ",ກ່າວເນັ້ນໃນເວລາດຽວກັນທີ່ອາຊຽນເລັ່ງລັດການກໍ່ສ້າງປະຊາຄົມ,ຈະເພີ່ມທະວີການແລກປ່ຽນກັນແລະການປະສານສົມທົບກັນກັບພາຍນອກ,ຍົກບົດບາດຂອງອາຊຽນທີ່ເປັນອົງການຂອງພາກພື້ນໃນວຽກງານສາກົນໃຫ້ສູງຂຶ້ນ.
ຖະແຫຼງການບາຫຼີທີ່ຮັບຮອງຜ່ານໃນກອງປະຊຸມສຸດຍອດເທື່ອນີ້ເອີ້ນວ່າ "ຖະແຫຼງ
ການວ່າດ້ວຍສົນທິສັນຍາບາຫຼີສະບັບທີ3". ຜູ້ນຳຂອງບັນດາປະເທດອາຊຽນທີ່ເຂົ້າຮ່ວມກອງປະຊຸມກ່າວວ່າ,ໂດຍປະເຊີນໜ້າສິ່ງທ້າທາຍໃນໂລກທີ່ນັບມື້ນັບເພີ່ມຂຶ້ນ, ອາຊຽນຈະເຂົ້າຮ່ວມວຽກງານສາກົນຢ່າງຕັ້ງໜ້າພາຍໃຕ້ຂອບເຂດທີ່ກວ້າງຂວາງກວ່າເກົ່າ,ເສີມຂະຫຍາຍບົດບາດອັນໃຫຍ່ຫຼວງກວ່າເກົ່າ,ພ້ອມທັງຊຸກຍູ້ທັດສະນະອາຊຽນພາຍໃນຂອບເຂດທົ່ວໂລກ,ສ້າງພາບພົດອາຊຽນທີ່ເປັນອົງການພາກພື້ນທີ່ໜ້າໄວ້ເນື້ອເຊື່ອໃຈກັນໃນປະຊາຄົມບັນດາປະເທດໃນໂລກ.
ຜູ້ນຳຂອງບັນດາປະເທດອາຊຽນກ່າວໃນກອງປະຊຸມວ່າ,ຄວນຮັກສາທ່າອ່ຽງການພັດທະນາທີ່ດີໃນປະຈຸບັນໃນການຮ່ວມມືຂອງອາຊີຕາເວັນອອກ,ເຫັນວ່າບັນດາກອງປະຊຸມສຸດຍອດອາຊີຕາເວັນອອກບໍ່ຄວນປຶກສາຫາລືບັນຫາທາງດ້ານການເມືອງແລະຄວາມໝັ້ນຄົງທີ່ມີຄວາມຂັດແຍ່ງກັນ.
ໃນເວລາຖະແຫຼງຂ່າວທີ່ຈັດຂຶ້ນຫຼັງກອງປະຊຸມ,ທ່ານມາທີ ນາຕາເລກາວາກ່າວວ່າ, ລັດຖະມົນຕີວ່າການກະຊວງການຕ່າງປະເທດອິນໂດເນເຊຍກ່າວວ່າ,ອາຊຽນຈະວາງແຜນປະຕິບັດງານອັນລະອຽດໂດຍອີງຕາມ "ຖະແຫຼງການບາຫຼີ"ໃນເທື່ອນີ້,ເສີມຂະຫຍາຍບົດບາດອັນໃຫຍ່ຫຼວງກວ່າເກົ່າເຂົ້າໃນວຽກງານສາກົນດ້ວຍການສະແດງຄວາມຄຶດຄວາມເຫັນດຽວກັນ.
