ກອງປະຊຸມສຸດຍອດຈີນ-ອາຊຽນຄັ້ງທີ 14 ໄດ້ຈັດຂຶ້ນຢູ່ເກາະບາຫຼີແຫ່ງອິນໂດເນເຊຍໃນວັນທີ 18 ພະຈິກນີ້, ກອງປະຊຸມອອກຖະແຫຼງການຮ່ວມເພື່ອລະລຶກການພົວພັນປະເທດຄູ່ເຈລະຈາລະຫວ່າງຈີນກັບອາຊຽນຄົບຮອບ 20 ປີ. ຖະແຫຼງການຂຽນວ່າ, ຈີນ ກັບ ປະເທດອາຊຽນເດັດດ່ຽວສຸມກຳລັງຈັດຕັ້ງປະຕິບັດເຂົ້າໃນ"ຖະແຫຼງການການກະທຳຂອງຝ່າຍຕ່າງໆຢູ່ທະເລຈີນໃຕ້"ຢ່າງເຕັມທີ່ ແລະ ບັງເກີດຜົນ, ແລະທຳຄວາມພະຍາຍາມເພື່ອຈັດລະບຽບການການກະທຳຢູ່ທະເລຈີນໃຕ້ບົນພື້ນຖານທີ່ປຶກສາຫາລືເປັນເອກະສັນກັນ.
ຖະແຫຼງການຊີ້ອອກວ່າ, ຝ່າຍຕ່າງໆຈະເພິ່ມທະວີຄວາມປອດໄພທາງທະເລ, ເຊິ່ງລວມທັງຮັບປະກັນເສລີພາບໃນການຄ້າ ພ້ອມທັງຄວາມປອດໄພໃນການເດີນເຮືອ ແລະ ຄົມມະນາຄົມທາງທະເລ, ເພິ່ມທະວີສັນຕິພາບ, ຄວາມປອດໄພ, ຄວາມຈະເລີນຮຸ່ງເຮືອງ ແລະ ຄວາມໄວ້ເນື້ອເຊື່ອໃຈກັນຂອງພາກພື້ນ, ສຸມກຳລັງຜ່ານການສົນທະນາ ແລະ ປຶກສາຫາລືກັນແກ້ໄຂຄວາມຂັດແຍ່ງ, ບໍ່ໃຊ້ກຳລັງອາວຸດ ຫຼື ຂົ່ມຂູ່ດ້ວຍກຳລັງອາວຸດ.
ຖະແຫຼງການຂຽນວ່າ, ຈີນຈະສະໜັບສະໜູນ ແລະ ຮ່ວມມືກັບອາຊຽນຢ່າງສະໜິດແໜ້ນ ເພື່ອບັນລຸປະຊາຄົມອາຊຽນທີ່ປະກອບດ້ວຍສາມເສົາຄ້ຳໃນປີ2015, ຄື,ປະຊາຄົມການເມືອງແລະຄວາມປອດໄພອາຊຽນ, ປະຊາຄົມເສດຖະກິດອາຊຽນ ແລະ ປະຊາຄົມວັດທະນະທຳສັງຄົມອາຊຽນ. ຖະແຫຼງການຍັງຂຽນວ່າການຮ່ວມມືລະຫວ່າງອາຊຽນກັບຈີນ, ຍີ່ປຸ່ນແລະສ.ເກົາຫຼີທີ່ຖືອາຊຽນເປັນຜູ່ນຳພານັ້ນຈະຍັງແມ່ນຊ່ອງທາງຕົ້ນຕໍທີ່ບັນລຸເປົ້າໝາຍໄລຍະຍາວທີ່ສ້າງປະຊາຄົມອາຊີຕາເວັນອອກ, ດຳເນີນການສົນທະນາກັນ ແລະ ການຮ່ວມມືໃນບັນຫາຍຸດທະສາດ,ການເມືອງ,ເສດຖະກິດທີ່ສົນໃຈຮ່ວມກັນ ແລະ ເອົາໃຈໃສ່ຢ່າງກວ້າງຂວາງ.
