ທ່ານເວີ່ນເຈຍປາວສິ້ນສຸດການຢ້ຽມຢາມອາຊີຕາເວັນອອກສຽງໃຕ້ແລະກັບຄືນເຖິງປັກກິ່ງ
(GMT+08:00) 2011-11-21 16:41:59 cri
ພາຍຫຼັງເຂົ້າຮ່ວມບັນດາກອງປະຊຸມສຸດຍອດອາຊີຕາເວັນອອກແລະຢ້ຽມຢາມບຼູໄນຢ່າງເປັນທາງການແລ້ວ, ຕອນບ່າຍວັນທີ21ພະຈິກນີ້, ທ່ານເວີ່ນເຈຍປາວ ນາຍົກລັດຖະມົນຕີຈີນໄດ້ເດີນທາງດ້ວຍເຮືອບິນພິເສດກັບຄືນເຖິງນະຄອນຫຼວງປັກກິ່ງແລ້ວ.
ໃນໄລຍະ5ວັນຜ່ານມາ, ທ່ານເວີ່ນເຈຍປາວໄດ້ເຂົ້າຮ່ວມການເຄື່ອນໄຫວຫຼາຍຝ່າຍແລະສອງຝ່າຍເກືອບ30ເທື່ອ. ໃນບັນດາກອງປະຊຸມສຸດຍອດອາຊີຕາເວັນອອກ, ໂດຍປິ່ນອ້ອມການພົວພັນຈີນອາຊຽນ, ການຮ່ວມມືລະຫວ່າງອາຊຽນກັບຈີນ, ຍີປຸ່ນແລະສ.ເກົາຫຼີ, ການຮ່ວມມືລະຫວ່າງຈີນ, ຍີ່ປຸ່ນແລະສ.ເກົາຫຼີ, ການຮ່ວມມືຂອງກອງປະຊຸມສຸດຍອດອາຊີຕາເວັນອອກແລະຫົວຂໍ້ຕ່າງໆ, ແມ່ນໄດ້ກ່າວຄຳປາໄສສຳຄັນຫຼາຍເທື່ອ, ໄດ້ບັນຍາຍເຖິງຫຼັກໝັ້ນແລະຈຸດຢືນຂອງຈີນກ່ຽວກັບການຮ່ວມມືແລະການພັດທະນາຂອງອາຊີຕາເວັນອອກໃນອະນາຄົດ, ແລະມີຂໍ້ລິເລີ່ມສຳຄັນເພື່ອລົງເລິກການຮ່ວມມືໃນພາກພື້ນອາຊີຕາເວັນອອກ, ໄດ້ສົ່ງຂໍ້ມູນຂ່າວສານໃນດ້ານຕັ້ງໜ້າຂອງຈີນທີ່ຢາກປະຕິບັດທິດທາງການຕ່າງປະເທດກັບປະເທດອ້ອມຂ້າງ ທີ່ເປັນມິດກັບປະເທດໃກ້ຄຽງແລະຖືປະເທດໃກ້ຄຽງເປັນໝູ່ຄູ່, ຍຶດຖືນະໂຍບາຍແລະທັດສະນະຄະຕິທີ່ພັດທະນາໂດຍສັນຕິແລະຕ່າງຝ່າຍຕ່າງມີຜົນປະໂຫຍດ ໃຫ້ຝ່າຍຕ່າງໆ.
ໃນໄລຍະປະຊຸມ, ທ່ານເວີ່ນເຈຍປາວຍັງໄດ້ພົບປະກັບຜູ້ນຳປະເທດຕ່າງໆທີ່ມາຮ່ວມປະຊຸມຢ່າງກວ້າງຂວາງ, ໄດ້ລົງເລິກແລກປ່ຽນຄວາມເຫັນກ່ຽວກັບການພົວພັນລະຫວ່າງສອງຝ່າຍແລະການຮ່ວມມືໃນພາກພື້ນອາຊີຕາເວັນອອກ, ແລະໄດ້ມີຄວາມຮັບຮູ້ຄືກັນຫຼາຍຢ່າງ.
ໃນໄລຍະຢ້ຽມຢາມບຼູໄນ, ທ່ານເວີ່ນເຈຍປາວໄດ້ພົບປະກັບຜູ້ນຳບຼູໄນ, ໄດ້ລົງເລິກແລກປ່ຽນຄວາມເຫັນກ່ຽວກັບການພົວພັນໄມຕີຈິດມິດຕະພາບຖານບ້ານໃກ້ເຮືອນຄຽງທີ່ດີແລະຊຸກຍູ້ການຮ່ວມມືທີ່ຕິດແທດຕົວຈິງລະຫວ່າງສອງປະເທດ, ແລະເຊັນສັນຍາຮ່ວມມືຫຼາຍສະບັບ, ໄດ້ວາງແຜນໃຫ້ແກ່ການຂະຫຍາຍການພົວພັນລະຫວ່າງສອງປະເທດໃນອະນາຄົດ.
