ງານມະຫາກຳກິລາອາຊີຕາເວັນອອກສຽງໃຕ້ຄັ້ງທີ26ອັດລົງ
(GMT+08:00) 2011-11-23 15:45:18 cri
ຕາມຂ່າວສານANTARAອິນໂດເນເຊຍລາຍງານວ່າ: ງານມະຫາກຳກິລາອາຊີຕາເວັນອອກສຽງໃຕ້ຫຼືຊີເກມຄັ້ງທີ26ໄດ້ອັດລົງແລ້ວໃນຕອນຄ່ຳວັນທີ22ພະຈິກນີ້ຢູ່ນະຄອນປາເລັມບັງແຂວງຊູມັດຕຼາໃຕ້ຂອງອິນໂດເນເຊຍ.
ພິທີປິດງານທີ່ມີຫົວຂໍ້ວ່າ"ໄຊຊະນະແຫ່ງຄວາມກົມກຽວກັນ"ໄດ້ຈັດຂຶ້ນໃນຕອນຄ່ຳວັນທີ22ພະຈິກນີ້ຢູ່ສູນກິລາສະລີວິຈາຢາຂອງນະຄອນປາເລັມບັງ.ທ່ານໂບອີດີໂອໂນ ຮອງປະທານາທິບໍດີອິນໂດເນເຊຍໄດ້ກ່າວຄຳປາໃສໃນພິທີປິດງານ,ທ່ານກ່າວວ່າ,ຜົນງານອັນພົ້ນເດັ່ນໃນງານມະຫາກຳກິລາຄັ້ງນີ້ແມ່ນໝາກຜົນແຫ່ງໄຊຊະນະຂອງປະຊາຊົນໃນພາກພື້ນອາຊີຕາເວັນອອກສຽງໃຕ້, ສະແດງໃຫ້ທົ່ວໂລກເຫັນເຖິງມິດຕະພາບອັນຈິງໃຈລະຫວ່າງປະຊາຊົນປະເທດຕ່າງໆໃນພາກພື້ນອາຊີຕາເວັນອອກສຽງໃຕ້.
ໃນພິທີປິດງານ,ທ່ານອູທິນ ຊານລັດຖະມົນຕີວ່າການກະຊວງຊາວໜຸ່ມແລະກິລາມຽນມາ ຊຶ່ງເປັນປະເທດເຈົ້າພາບຈັດງານມະຫາກຳກິລາອາຊີຕາເວັນອອກສຽງໃຕ້ຫຼືຊີເກມຄັ້ງທີ27ໄດ້ຮັບເອົາທຸງຊີເກມ,ນັກສິລະປິນ50ຄົນຂອງມຽນມາໄດ້ສະແດງການເຕັ້ນລຳພື້ນເມືອງມຽນມາ.
ງານມະຫາກຳກິລາອາຊີຕາເວັນອອກສຽງໃຕ້ຄັ້ງທີ26ໄຂຂຶ້ນໃນວັນທີ11ພະຈິກນີ້ແລະດຳເນີນການແຂ່ງຂັນມາເປັນເວລາ12ວັນ.ອິນໂດເນເຊຍເປັນເຈົ້າຫຼຽນຄຳຄອງອັນດັບທີໜຶ່ງໃນການຈັດອັນດັບຕາຕະລາງຫຼຽນຄືໄດ້ຫຼຽນຄຳ182ຫຼຽນ,ຫຼຽນເງິນ151ຫຼຽນແລະຫຼຽນທອງ143ຫຼຽນ,ໄທເປັນອັນດັບສອງ,ແລະຫວຽດນາມເປັນອັນດັບ3.ງານມະຫາກຳກິລາອາຊີຕາເວັນອອກສຽງໃຕ້ຫຼືຊີເກມຄັ້ງທີ27ຈະຈັດຂຶ້ນຢູ່ນະຄອນຫຼວງເນປີດໍຂອງມຽນມາໃນປີ2013.
