ທີ່ປຶກສາແຫ່ງລັດຈີນປະກອບຄຳເຫັນກ່ຽວກັບບັນຫາອາຊີປາຊີຟິກ
(GMT+08:00) 2011-11-23 16:22:53 cri
ໜັງສືພິມເຢິນມິນຢື້ປ້າວຂອງຈີນລາຍງານວ່າ: ວັນທີ21ພະຈິກນີ້,ຢູ່ນະຄອນຫຼວງປັກກິ່ງ,ທ່ານຕ້າຍປີງໂກວ ທີ່ປຶກສາແຫ່ງລັດຈີນໄດ້ປະກອບຄຳເຫັນຫຼາຍຂໍ້ກ່ຽວກັບບັນຫາອາຊີປາຊີຟິກ.
ທ່ານຕ້າຍປີງໂກວກ່າວວ່າ,ສະຕະວັດທີ21ຄວນແມ່ນສະຕະວັດທີ່ໜ່ວຍໂລກມວນມະນຸດມີສັນຕິພາບ,ການພັດທະນາແລະການຮ່ວມມື.ເວົ້າສຳລັບພາກພື້ນອາຊີປາຊີຟິກທີ່ເປັນສ່ວນປະກອບອັນສຳຄັນຂອງໜ່ວຍໂລກເຮົາ,ສະຕະວັດທີ21ກໍ່ຄວນແມ່ນສະຕະວັດທີ່ມີສັນຕິພາບ,ການພັດທະນາແລະການຮ່ວມມື.
ທ່ານຕ້າຍປີງໂກວກ່າວຕໍ່ໄປວ່າ,ຖ້າຢາກຮັກສາສັນຕິພາບອັນຖາວອນຂອງພາກພື້ນອາຊີປາຊີຟິກ,ທຸກຄົນລ້ວນແຕ່ຄວນເປັນຜູ່ປົກປັກຮັກສາແລະຊຸກຍູ້ສັນຕິພາບ,ສະຖຽນລະພາບແລະຄວາມຈະເລີນຮຸ່ງເຮືອງ,ເຄົາລົບເຊິ່ງກັນແລະກັນ,ປະຕິບັດຕໍ່ກັນຢ່າງສະເໝີພາບ,ຢູ່ຮ່ວມກັນຢ່າງກົມກຽວປອງດອງກັນແລະພັດທະນາຮ່ວມກັນ.
ທ່ານຕ້າຍປີງໂກວກ່າວຕື່ມວ່າ,ພາກພື້ນອາຊີປາຊີຟິກມີສະພາບຫຼາຍດ້ານທີ່ຕ່າງກັນກັບພາກພື້ນອື່ນໆ,ຢູ່ພາກພື້ນອາຊີປາຊີຟິກເຮັດອັນໃດ,ບໍ່ເຮັດອັນໃດ,ຈະເຮັດແນວໃດ,ເຮັດໃນເວລາໃດຊຶ່ງເຫຼົ່ານີ້ ລ້ວນແຕ່ຄວນປະຕິບັດຕາມສະພາບຕົວຈິງແລະບົດຮຽນອັນປະເສີດຂອງພາກພື້ນນີ້,ປະສານງານຢ່າງເຕັມທີ່,ຮັບຟັງຄຳຄິດຄຳເຫັນຂອງປະເທດຕ່າງໆໃນພາກພື້ນນີ້,ຄຳນຶງເຖິງຄວາມຮູ້ສຶກພໍໃຈຫຼືບໍ່ຂອງປະເທດຕ່າງໆ.
ທ່ານຕ້າຍປີງໂກວກ່າວວ່າ, ໃນຖານະເປັນສະມາຊິກຂອງມະຫາຄອບຄົວອາຊີ, ຈີນທະໜຸຖະໜອມທີ່ສຸດຕໍ່ສະຖານະພາບທີ່ດີທີ່ໄດ້ມາດ້ວຍຄວາມລຳບາກຂອງພາກພື້ນອາຊີ,ຈີນຈະຮ່ວມກັບປະເທດໃນອາຊີຢ່າງເດັດດ່ຽວໜຽວແໜ້ນ,ບໍ່ລົດລະໃນຄວາມພະຍາຍາມເພື່ອປົກປັກຮັກສາແລະຊຸກຍູ້ສັນຕິພາບ,ສະຖຽນລະພາບແລະຄວາມຈະເລີນຮຸ່ງເຮືອງຂອງອາຊີ.
