ຜູ່ຊ່ຽວຊານສະເໜີໃຫ້ຊຸກຍູ້ການຮ່ວມມືລະຫວ່າງຈີນກັບອາຊຽນໃນຂົງເຂດກິລາມວນຊົນ
(GMT+08:00) 2011-11-23 16:39:36 cri
ຕາມຂ່າວສານຊິນຮວາ: ຢູ່ທີ່ກອງປະຊຸມເວທີປຶກສາຫາລືກ່ຽວກັບການພັດທະນາແລະການຮ່ວມມືດ້ານກິລາມວນຊົນພາກພື້ນອາຊີແລະໂອຊີອານີແລະກອງປະຊຸມເວທີປຶກສາຫາລືກ່ຽວກັບການພັດທະນາແລະການຮ່ວມມືດ້ານກິລາມວນຊົນຈີນ-ອາຊຽນທີ່ຈັດຂຶ້ນໃນຫວ່າງມໍ່ໆມານີ້ຢູ່ນະຄອນນານນິງເຂດປົກຄອງຕົນເອງເຜົ່າຈວ້າງກວາງຊີຂອງຈີນ,ທ່ານລູຢວນເຈີ້ນ ອາຈານສອນນັກສຶກສາປະລິນຍາເອກ,ສາສະດາຈານສະຖາບັນວິທະຍາສາດການກິລາຂອງມະຫາວິທະຍາໄລສ້າງຄູຮວານານຈີນກ່າວວ່າ,ຈີນແລະປະເທດອາຊຽນຄວນຊຸກຍູ້ການຮ່ວມມືກັນໃນຂົງເຂດກິລາມວນຊົນຜ່ານ2ດ້ານຄືຜ່ານການຮ່ວມມືລະຫວ່າງຊາດແລະຜ່ານໂຄງການວັດທະນະທຳ.
ທ່ານລູຢວນເຈີ້ນກ່າວວ່າ,ການແລກປ່ຽນດ້ານວັດທະນະທຳແມ່ນກຳລັງແຮງອັນໜຶ່ງໃນການຊຸກຍູ້ການພັດທະນາຂອງປະຫວັດສາດ,ຄວາມຕ້ອງການຕໍ່ວັດທະນະທຳກິລາແມ່ນທ່າອ່ຽງອັນໜຶ່ງໃນການພັດທະນາວັດທະນະທຳກິລາຂອງໂລກໃນສະຕະວັດທີ21,ແນ່ນອນວ່າຈະພາໃຫ້ມີການແລກປ່ຽນດ້ານວັດທະນະທຳ.
ທ່ານລູຢວນເຈີ້ນເຫັນວ່າ,ຈີນແລະອາຊຽນຄວນຊຸກຍູ້ການຈັດງານມະຫາກຳກິລາຕາເວັນອອກທີ່ມີຈີນແລະປະເທດອາຊຽນເຂົ້າຮ່ວມເປັນຕົ້ນຕໍ,ແລະຖືວຽກງານດ້ານນີ້ເປັນເວທີດຳເນີນງານແບບສັນຍາລັກເພື່ອໃຫ້ມີການພັດທະນາຢ່າງໝັ້ນທ່ຽງແລະຍາວນານຕໍ່ໄປ,ໃນທີ່ສຸດກາຍເປັນສະພາບທົ່ວໂລກດັ່ງທີ່ງານກິລາໂອລິມປິກທີ່ຖືການແຂ່ງຂັນເປັນຕົ້ນຕໍຂອງປະເທດຕາເວັນຕົກກັບງານມະຫາກຳກິລາຕາເວັນອອກທີ່ຖືການຫັດກາຍບໍລິຫານຢ່ອນອາລົມເປັນຕົ້ນຕໍຂອງປະເທດຕາເວັນອອກເພື່ອຮ່ວມກັນສ້າງສາວັດທະນະທຳກິລາທີ່ດີເດັ່ນຂອງໂລກ.
