ຄະນະຜູ້ແທນພະນັກງານລາວໄປຄົ້ນຄວ້າບົດຮຽນຫຼຸດຜ່ອນຄວາມທຸກຍາກຢູ່ເຂດກວາງຊີຈີນ
(GMT+08:00) 2011-11-28 14:38:31 cri
ວັນທີ26ພະຈິກນີ້, ຢູ່ນະຄອນໜານໜິງ ເທດສະບານເຂດປົກຄອງຕົນເອງເຜົ່າຈ້ວງກວາງຊີຈີນ, ຄະນະຜູ້ແທນພະນັກງານລາວທີ່ນຳໂດຍທ່ານສົມດີ ດວງດີ ກຳມະການສູນກາງພັກປະຊາຊົນປະຕິວັດລາວ, ລັດຖະມົນຕີວ່າການກະຊວງແຜນການແລະການລົງທຶນແຫ່ງສປປລາວ ໄດ້ແລກປ່ຽນບົດຮຽນໃນການຫຼຸດຜ່ອນຄວາມທຸກຍາກກັບພາກສ່ວນທີ່ກ່ຽວຂ້ອງຂອງເຂດກວາງຊີ, ຄົ້ນຄວ້າຊ່ອງທາງໃໝ່ເພື່ອຊ່ວຍຫຼຸດຜ່ອນຄວາມທຸກຍາກແລະສ້າງຄວາມຮັ່ງມີເຂັ້ມແຂງຢູ່ເຂດຊົນນະບົດ.
ຄະນະຜູ້ແທນລາວມີຄວາມສົນໃຈຫຼາຍຕໍ່ເຂດກວາງຊີທີ່ນຳໃຊ້ມາດຕະການຊຸກຍູ້ການຫຼຸດຜ່ອນຄວາມທຸກຍາກໃນບ້ານໜຶ່ງ ເພື່ອຊຸກຍູ້ໃຫ້ເສດຖະກິດສັງຄົມຂອງບ້ານນັ້ນໄດ້ມີການພັດທະນາຢ່າງຮອບດ້ານ. ຕາມຂ່າວແຈ້ງວ່າ, ໃນ5ປີຂ້າງໜ້ານີ້, ບ້ານທຸກຍາກ3ພັນບ້ານຂອງເຂດກວາງຊີຈະໃຊ້ຮູບການດັ່ງກ່າວເພື່ອບັນລຸເປົ້າໝາຍຫຼຸດຜ່ອນຄວາມທຸກຍາກແລະສ້າງຄວາມຮັ່ງມີເຂັ້ມແຂງ.
ທ່ານສົມດີ ດວງດີກ່າວວ່າ, ເຂດກວາງຊີໄດ້ຮັບຜົນສຳເລັດຢ່າງໃຫຍ່ຫຼວງໃນວຽກງານຫຼຸດຜ່ອນຄວາມທຸກຍາກແລະການພັດທະນາ, ນີ້ຈະເປັນບົດຮຽນອັນລ້ຳຄ່າສຳລັບປະເທດລາວ. ຈຸດປະສົງການມາແລກປ່ຽນແລະຄົ້ນຄວ້າການພັດທະນາວຽກງານຫຼຸດຜ່ອນຄວາມທຸກຍາກຢູ່ເຂດກວາງຊີ, ແມ່ນເພື່ອຢາກຄົ້ນຄວ້າຖອດຖອນເອົາບົດຮຽນທີ່ດີຂອງເຂດກວາງຊີ, ເພື່ອໝູນໃຊ້ເຂົ້າໃນວຽກງານຫຼຸດຜ່ອນຄວາມທຸກຍາກຢູ່ລາວໂດຍອີງຕາມສະພາບຕົວຈິງຂອງແຕ່ລະທ້ອງຖິ່ນໃນລາວ.
