ຕາມຂ່າວຈາກ"ໜັງສືພິມເຢີນມິນຢື້ປ້າວ": ວັນທີ 25 ພະຈິກນີ້, ພັກສັນນິບາດແຫ່ງຊາດເພື່ອປະຊາທິປະໄຕຫຼືNLDຂອງມຽນມາທີ່ນຳພາໂດຍນາງອອງຊານຊູຈີ ຜູ່ນຳຝ່າຍຕໍ່ຕ້ານລັດຖະບານມຽນມາໄດ້ຍືນເອກະສານເພື່ອຮ້ອງຂໍຂຶ້ນທະບຽນເປັນພັກການເມືອງຄືນໃໝ່, ເພື່ອເຂົ້າຮ່ວມການເລືອກຕັ້ງເພິ່ມເຕີມໃນລັດຖະສະພາ, ນີ້ແມ່ນຂີດໝາຍສະແດງໃຫ້ເຫັນວ່າ,ຫຼັງຈາກຍົກເລີກການກັກບໍລິເວນໂດຍທາງອ້ອມເປັນເວລາໜຶ່ງປີ, ນາງອອງຊານຊູຈີໄດ້ກັບຄືນສູ່ເວທີການເມືອງຂອງມຽນມາຢ່າງເປັນທາງການ.
ຂ່າວສານອາເປລາຍງານວ່າ, ຕອນເຊົ້າວັນທີ 25 ພະຈິກນີ້, ຢູ່ນະຄອນຫຼວງເນປີດໍ,ຜູ່ຕາງໜ້າພັກສັນນິບາດແຫ່ງຊາດເພື່ອປະຊາທິປະໄຕຫຼືLNDຂອງມຽນມາໄດ້ສະເໜີເອກະສານກ່ຽວກັບການຮ້ອງຂໍຂຶ້ນທະບຽນພັກການເມືອງຄືນໃໝ່ຕໍ່ຄະນະກຳມະການເລືອກຕັ້ງແຫ່ງຊາດມຽນມາ,ຄາດວ່າຫຼັງຈາກນັ້ນໜຶ່ງອາທິດຈະໄດ້ຮັບຄຳອະນຸມັດ.
ປີ2010ຜ່ານມາ, ພັກສັນນິບາດແຫ່ງຊາດເພື່ອປະຊາທິປະໄຕຂອງມຽນມາປະກາດຂວ້ຳບາດການເລືອກຕັ້ງ, ປະຕິເສດບໍ່ໃຫ້ຂຶ້ນທະບຽນເປັນພັກການເມືອງຄືນໃໝ່. ອີງຕາມກົດໝາຍຂຶ້ນທະບຽນພັກການເມືອງໃນເວລານັ້ນ, ພັກສັນນິບາດແຫ່ງຊາດເພື່ອປະຊາທິປະໄຕໄດ້ເສຍສິດທີ່ເປັນພັກການເມືອງແລ້ວ, ໝາຍຄວາມວ່າເປັນການຍຸບພັກໂດຍອັດຕະໂນມັດ. ແຕ່ວ່າ, ກ່ອນນີ້ບໍ່ດົນ, ພາຍຫຼັງທ່ານອູເທນເຊັນປະທານາທິບໍດີມຽນມາອະນຸມັດດັດແກ້ກົດໝາຍວ່າດ້ວຍການຂຶ້ນທະບຽນ ພັກການເມືອງ, ຍົກເລີກການຈຳກັດຫ້າມບໍ່ໃຫ້"ຜູ່ຕ້ອງໂທດທາງການເມືອງເຂົ້າຮ່ວມການເຄື່ອນໄຫວທາງການເມືອງແລ້ວນັ້ນ, ເຮັດໃຫ້ນາງອອງຊານຊູຈີສາມາດກັບຄືນສູ່ເວທີການເມືອງໄດ້ອີກ. ວັນທີ 18 ພະຈິກນີ້, ພັກສັນນິບາດແຫ່ງຊາດເພື່ອປະຊາທິປະໄຕມຽນມາຕົກລົງຮ້ອງຂໍຂຶ້ນທະບຽນສ້າງຕັ້ງເປັນພັກການເມືອງຄືນໃໝ່,ແລະເຂົ້າຮ່ວມການເລືອກຕັ້ງເພິ່ມເຕີມຂອງລັດຖະສະພາທີ່ຈະຈັດຂຶ້ນໃນທ້າຍປີນີ້.ປັດຈຸບັນ, ລັດຖະບານມຽນມາຍັງບໍ່ໄດ້ກຳນົດເວລາທີ່ແນ່ນອນໃນການຈັດການເລືອກຕັ້ງເພິ່ມເຕີມ, ນາງອອງຊານຊູຈີໄດ້ຮຽກຮ້ອງໃຫ້ພັນທະມິດປະຊາທິປະໄຕເຂົ້າຮ່ວມການແຂ່ງຂັນໃນທີ່ນັ່ງທັງໝົດນັ້ນ.
ທ້າຍເດືອນມີນາປີນີ້, ຫຼັງຈາກລັດຖະບານທີ່ເລືອກຕັ້ງໂດຍປະຊາຊົນທີ່ນຳພາໂດຍທ່ານອູເທນເຊັນຂຶ້ນກຳອຳນາດ ໄດ້ເລິ່ມປະຕິບັດມາດຕະການໃໝ່ຕ່າງໆທີ່ຊຸກຍູ້ການປະຕິຮູບປະຊາທິປະໄຕ. ວັນທີ 24 ພະຈິກນີ້, ລັດຖະສະພາມຽນມາໄດ້ຜ່ານຮັບຮອງຍັດຕິໃໝ່ຂໍ້ໜຶ່ງ, ອະນຸມັດໃຫ້ມວນຊົນສາມາດຈັດງານໂຮມຊຸມນຸມແບບສັນຕິ, ນີ້ແມ່ນການກະທຳຫຼ້າສຸດໃນການປະຕິຮູບປະຊາທິປະໄຕຕ່າງໆຂອງມຽນມາໃນຫຼາຍປີມໍ່ໆມານີ້. ວັນທີ 19 ສິງຫາປີນີ້, ທ່ານອູເທນເຊັນໄດ້ຈັດການປຶກສາຫາລືກັບນາງອອງຊານຊູຈີຢູ່ນະຄອນຫຼວງເນປີດໍ. ຫຼັງຈາກນັ້ນ, ລັດຖະບານມຽນມາໄດ້ປະກາດຢ່າງເປີດເຜີຍວ່າ, ຖ້າສັນນິບາດແຫ່ງຊາດເພື່ອປະຊາທິປະໄຕຍິນດີກັບຄືນສູ່ເວທີການເມືອງ, ລັດຖະບານມຽນມາຍິນດີຮ່ວມມືກັບນາງອອງຊານຊູຈີ. ລັດຖະບານໃໝ່ຂອງມຽນມາຍັງໄດ້ອະໄພໂທດຜ່ອນໂທດແລະປ່ອຍຕົວນັກໂທດຫຼາຍພັນຄົນ,ແລະຜ່ອນຄາຍການຄຸ້ມຄອງຕໍ່ສື່ມວນຊົນ. ມາດຕະການປະຕິຮູບເຫຼົ່ານີ້ໄດ້ຮັບການຕີລາຄາຢ່າງຕັ້ງໜ້າຈາກປະຊາຄົມໂລກ, ອາທິດແລ້ວນີ້, ກອງປະຊຸມສຸດຍອດອາຊຽນໄດ້ອະນຸຍາດມຽນມາເປັນປະເທດປະທານໝູນວຽນຂອງອາຊຽນໃນປີ2014.
ນັກວິເຄາະກ່າວວ່າ, ໃຫ້ພັກສັນນິບາດແຫ່ງຊາດເພື່ອປະຊາທິປະໄຕມຽນມາເຂົ້າຮ່ວມການເມືອງອີກເທື່ອໃໝ່ຈະສາມາດຊ່ວຍໃຫ້ລັດຖະບານໃໝ່ຂອງມຽນມາສາມາດຍົກສູງປະຊາທິປະໄຕໃນການປົກຄອງທີ່ມີຄວາມຮັບຜິດຊອບທາງດ້ານກົດໝາຍຫຼາຍຂຶ້ນ, ທັບມ້າງການໂດດດ່ຽວຈາກສາກົນ ແລະ ການລົງໂທດຕໍ່ມຽນມາຈາກປະເທດຕາເວັນຕົກ, ແຕ່ວ່າມາດຕະການນີ້ກໍ່ຈະຍົກສູງບົດບາດຂອງນາງອອງຊານຊູຈີ ແລະ ພັກສັນນິບາດແຫ່ງຊາດເພື່ອປະຊາທິປະໄຕທີ່ເຊິ່ງມີນາງເປັນຜູ່ນຳພາແລະຕັດສິນທາງການເມືອງເປັນເວລາຍາວນານ.
