ປະທານສະພາຈີນພົບປະປະທານສະພາແຫ່ງຊາດກຳປູເຈຍ
(GMT+08:00) 2011-12-06 10:19:10 cri
ວັນທີ5ທັນວານີ້, ຢູ່ນະຄອນຫຼວງປັກກິ່ງ, ທ່ານອູປາງກົວ ປະທານສະພາປະຊາຊົນແຫ່ງຊາດຈີນໄດ້ພົບປະທ່ານແຮັງ ຊຳຣິມ ປະທານສະພາແຫ່ງຊາດກຳປູເຈຍ.
ທ່ານອູປາງກົວກ່າວວ່າ, ປີ2010ຜ່ານມາ, ສອງປະເທດໄດ້ສ້າງການພົວພັນຄູ່ຮ່ວມມືຍຸດທະສາດຮອບດ້ານ, ໄມຕີຈິດມິດຕະພາບລະຫວ່າງຈີນກັບກຳປູເຈຍໄດ້ກ້າວຂຶ້ນສູ່ລະດັບໃໝ່. ຈີນຍິນດີພະຍາຍາມຮ່ວມກັບກຳປູເຈຍ, ຮັກສາທ່ວງທ່າທີ່ໃຫ້ຜູ້ນຳລະດັບສູງຢ້ຽມຢາມເຊິ່ງກັນແລະກັນ, ເພີ່ມທະວີການໄປມາຫາສູ່ຢ່າງມີໄມຕີຈິດມິດຕະພາບ, ລົງເລິກການຮ່ວມມືທາງເສດຖະກິດການຄ້າ, ພະຍາຍາມເຮັດໃຫ້ເປົ້າໝາຍດ້ານການເຕີບໂຕທາງການຄ້າລະຫວ່າງສອງປະເທດໃນປີ2015ນັ້ນ ໃຫ້ສຳເລັດຜົນກ່ອນເວລາກຳນົດ. ເພີ່ມທະວີການຮ່ວມມືໃນຂົງເຂດຄວາມໝັ້ນຄົງ, ຮ່ວມກັນປາບປາມການກະທຳຜິດແລະການກໍ່ການຮ້າຍຂ້າມແດນ. ຮັດແໜ້ນການປຶກສາຫາລືແລະປະສານງານໃນວຽກງານຫຼາຍຝ່າຍ, ເຮັດໃຫ້ເນື້ອໃນຂອງການພົວພັນຄູ່ຍຸດທະສາດຮອບດ້ານລະຫວ່າງສອງປະເທດອຸດົມສົມບູນກວ່າເກົ່າ, ເພື່ອສ້າງຄວາມຜາສຸກແກ່ປະຊາຊົນສອງຊາດ.
ທ່ານແຮັງ ຊຳຣິນ ກ່າວວ່າ, ລັດຖະບານ, ສະພາແຫ່ງຊາດແລະປະຊາຊົນກຳປູເຈຍສຸດທິທະນຸຖະໜອມມິດຕະພາບທີ່ມີມູນເຊື້ອກັບຈີນ, ຊົມເຊີຍຕໍ່ຈີນທີ່ໄດ້ຮັບຜົນສຳເລັດອັນໃຫຍ່ຫຼວງໃນການພັດທະນາເສດຖະກິດສັງຄົມ, ຍິນດີຮ່ວມກັບຈີນ, ຊຸກຍູ້ການພົວພັນກຳປູເຈຍຈີນຂະຫຍາຍໄປໜ້າຢ່າງບໍ່ຢຸດຢັ້ງ. ທ່ານກ່າວຢ້ຳວ່າ, ກຳປູເຈຍຈະຍຶດໝັ້ນປະຕິບັດເໝືອນດັ່ງເຄີຍປະຕິບັດຜ່ານມາໃນການສະໜັບສະໜູນນະໂຍບາຍຈີນດຽວ.
