ຕາມຂ່າວສານຊິນຮວາ: ວັນທີ 6 ທັນວານີ້, ຢູ່ຫໍສະພາປະຊາຊົນຈີນ,ທ່ານຊີຈີ້ນຜິງ ຮອງປະທານປະເທດຈີນໄດ້ພົບປະທ່ານເຮັງ ຊຳຣິນ ປະທານສະພາແຫ່ງຊາດກຳປູເຈຍ.
ທ່ານຊີຈີ້ນຜິງກ່າວວ່າ, ຈີນກັບກຳປູເຈຍແມ່ນປະເທດບ້ານໃກ້ເຮືອນຄຽງທີ່ມີໄມຕີຈິດ, ມິດຕະພາບອັນເປັນມູນເຊື້ອທີ່ໝັ້ນແກ່ນມາແຕ່ບູຮານນະການ. ຊຸມປີມໍ່ໆມານີ້, ການແລກປ່ຽນ ແລະ ການຮ່ວມມືລະຫວ່າງສອງປະເທດໃນຂົງເຂດຕ່າງໆ ເຊັ່ນ,ການເມືອງ, ເສດຖະກິດ, ວັດທະນະທຳ ແລະ ການສຶກສາໄດ້ຮັບການພັດທະນາລົງເລິກຕື່ມອີກ,ໄດ້ຮັບໝາກຜົນທີ່ດີຢ່າງຫຼວງຫຼາຍ, ສ້າງຜົນປະໂຫຍດອັນແທ້ຈິງໃຫ້ແກ່ປະຊາຊົນສອງປະເທດ. ໃນກອງປະຊຸມຕ່າງໆຂອງກອງປະຊຸມສຸດຍອດອາຊີຕາເວັນອອກທີ່ໄດ້ຈັດຂຶ້ນກ່ອນໜ້ານີ້ບໍ່ດົນ, ສອງປະເທດຈີນ-ກຳປູເຈຍແລກປ່ຽນກັນ ແລະ ປະສານສົມທົບກັນຢ່າງແໜ້ນແຟ້ນ, ໄດ້ເສີມຂະຫຍາຍບົດບາດອັນຕັ້ງໜ້າເພື່ອຜົນສຳເລັດຂອງກອງປະຊຸມ. ຝ່າຍຈີນຍິນດີສືບຕໍ່ເພິ່ມທະວີການປຶກສາຫາລື ແລະ ການປະສານງານກັບຝ່າຍກຳປູເຈຍໃນງານວຽກງານສາກົນ ແລະ ພາກພື້ນຕ່າງໆ ເຊັ່ນ,ສະຫະປະຊາຊາດ, ການຮ່ວມມືອາຊີຕາເວັນອອກ ແລະ ເວທີປຶກສາຫາລືພາກພື້ນອາຊຽນເປັນຕົ້ນ, ປະກອບສ່ວນຢ່າງຕັ້ງໜ້າເຂົ້າໃນສັນຕິພາບ,ສະຖຽນລະພາບ ແລະ ຄວາມຈະເລີນຮຸ່ງເຮືອງຂອງພາກພື້ນແລະຂອງໂລກ.
