ຜູ້ຮູ້ໃຈກັນ
ເວົ້າສຳລັບຄົນເຮົາແລ້ວ, ສິ່ງທີ່ຮູ້ຍາກທີ່ສຸດຫຼືເຂົ້າໃຈຍາກທີ່ສຸດກໍ່ແມ່ນໃຈຄົນ, ມັນແມ່ນເລື່ອງຈິດໃຈລ້ວນໆ, ເບິ່ງບໍ່ເຫັນ, ຄຳບໍ່ຖືກ. ຮ່າງກາຍຂອງຄົນເອົາໄປຄົ້ນຄວ້າທາງຊີວະຢູ່ໃຕ້ກ້ອງຈຸລະທັດໄດ້, ແຕ່ວິນຍານຂອງຄົນເຮັດແບບນີ້ບໍ່ໄດ້, ຈະເອົາວິຍານຂອງຄົນໄປວິໄຈທາງຊີວະວິທະຍາບໍ່ໄດ້, ມີແຕ່ໃຊ້ຈິດວິນຍານຂອງອີກຜູ້ໜຶ່ງໄປຊາບຊຶມສຳຜັດເອົາ. ຖ້າຄົນຜູ້ໜຶ່ງເຂົ້າໃຈຈິດວິນຍານຂອງອີກຄົນໜຶ່ງແລ້ວ, ສອງຄົນນີ້ກໍຈະເຊື່ອມໂຍງເຂົ້າກັນ, ລຸລ່ວງກັນໄດ້. ສິ່ງທີ່ຍາກທີ່ສຸດລະຫວ່າງຄົນເຮົາກໍແມ່ນການລຸລ່ວງກັນທາງຈິດໃຈ, ຜູ້ຮູ້ໃຈກັນກໍແມ່ນຜູ້ທີ່ສາມາດເຂົ້າໃຈພວກເຮົາລຸລ່ວງກັບພວກເຮົາທາງຈິດໃຈໄດ້. ບາງເທື່ອ, ຄວາມເວົ້າຂອງຄົນສອງຄົນຄືອອກຈາກປາກຂອງຄົນດຽວ, ນີ້ກໍ່ແມ່ນຍ້ອນຄວາມເຂົ້າໃຈກັນຢ່າງເລິກເຊິ່ງທີ່ສຸດລະຫວ່າງສອງຄົນ.
ຜູ້ຮູ້ໃຈເຮົານັ້ນ, ບໍ່ແນ່ວ່າຈະຢູ່ໃກ້ພວກເຮົາທຸກເຊົ້າຄ່ຳ, ແຕ່ບໍ່ວ່າຈະໄກຈາກເຮົາປານໃດ, ກໍຄືຢູ່ໃກ້ຄຽງກັນສະເໝີ, ພວກເຮົາຈະຮູ້ສຶກວ່າຕົນເອງບໍ່ໂດດດ່ຽວ. ຈີນມີກະວີບົດໜຶ່ງເວົ້າວ່າ: "ໃນໂລກນີ້ມີເພື່ອນຜູ້ຮູ້ໃຈກັນ, ເຖິງຈະຢູ່ຄົນລະຂອບຟ້າ, ກໍ່ເໝືອນຢູ່ໃກ້ຄຽງກັນ". ດ້ວຍເຫດນີ້, ບໍ່ວ່າພວກເຮົາຈະປະສົບຄວາມລົ້ມແຫຼວແລະອຸປະສັກແນວໃດກໍ່ຕາມ, ຂໍແຕ່ວ່າມີເພື່ອນຜູ້ຮູ້ໃຈກັນ, ເກີດມາຊາດນີ້, ກໍ່ກຸ້ມຄ່າແລ້ວ. ຈີນຍັງມີຄຳບູຮານວ່າ: ໃນຕະຫຼອດຊີວິດມີເພື່ອນຜູ້ຮູ້ໃຈກັນຜູ້ດຽວກໍພໍໃຈແລ້ວ.
ເຊື່ອວ່າ, ມິດຕະພາບອັນແທ້ຈິງນັ້ນ, ຈະເພີ່ມຄວາມມ່ວນຊື່ນແລະຫຼຸດຜ່ອນຄວາມທຸກທໍລະມານໃນຊີວິດຄົນເຮົາໄດ້, ຜູ້ທີ່ຂາດເພື່ອນຜູ້ຮູ້ໃຈ, ຈະເປັນຄົນທີ່ໂດດດ່ຽວປ່ຽວພອຍທີ່ເປັນຕາສົງສານ. ສະນັ້ນ, ຂໍໃຫ້ທ່ານຈົ່ງຊອກພົບເພື່ອຜູ້ຮູ້ໃຈໃນຊີວິດຂອງທ່ານ, ຖ້າໄດ້ຊອກພົບແລ້ວ, ຈົ່ງຖະໜອມຫວງແຫນມິດຕະພາບອັນລ້ຳຄ່າທີ່ສຸດນີ້ໄວ້!
