ຢ່າໃຈຮ້າຍ
(GMT+08:00) 2012-03-12 10:14:27 cri
ໃນຊີວິດຄົນເຮົາ, ບາງທີພວກເຮົາກໍຄືກັນກັບເດັກຊາຍໃນເລື່ອງດັ່ງກ່າວນີ້, ຄຸມອາລົມຂອງຕົນບໍ່ໄດ້, ແລ້ວຮ້າຍຜູ້ອື່ນ, ຢ່າຄຶດວ່າເມື່ອເຮົາຮ້າຍໃສ່ຜູ້ອື່ນແລ້ວ, ຂໍໂທດນຳຜູ້ນັ້ນບາດໜຶ່ງ, ເຂົາເຈົ້າກໍຈະລືມສິ່ງເຫຼົ່ານັ້ນໄປໝົດຄືບໍ່ເຄີຍມີຫຍັງເກີດຂຶ້ນ. ຈີນມີຄຳບູຮານຄວາມໜຶ່ງວ່າ: ແວ່ນແຍງແຕກແລ້ວ, ເຮັດໃຫ້ດີຄືນຄືເກົ່າບໍ່ໄດ້, ເຖິງວ່າຈະຕາບມັນເຂົ້າກັນໄດ້, ແຕ່ມັນກໍ່ຍັງມີຮອຍແຕກຢູ່ສະເໝີ. ຄວາມສຳພັນຂອງມະນຸດກໍ່ຄືກັນ, ບາດໃຈຜູ້ອື່ນໃນເວລາເຮົາໃຈຮ້າຍນັ້ນ, ບໍ່ວ່າເຮັດແນວໃດ, ກໍ່ບໍ່ອາດດີຄືນຄືເກົ່າ 100% ໄດ້ອີກແລ້ວ. ເສຍດາຍ, ມິດຕະພາບອັນລ້ຳຄ່າແລະຄວາມຮັກແພງກັນທີ່ຈິງໃຈນັ້ນ, ບາງທີກໍ່ໄດ້ຖືກທຳລາຍຍ້ອນຄວາມໃຈຮ້າຍຂອງເຮົາພຽງຊົ່ວວູບດຽວ. ນອກນີ້, ຖ້າເຮົາເປັນຄົນນິດໄສບໍ່ດີ, ມັກຮ້າຍຜູ້ອື່ນ, ຜູ້ອື່ນກໍຈະຊັງເຮົາ, ກໍລັງກຽດເຮົາ, ບໍ່ຢາກຄົບຄ້າສະມາຄົມກັບເຮົາອີກ, ສຸພາສິດລາວກໍ່ເວົ້າວ່າ: ຄວາມໂມໂຫພາໃຫ້ໂຕຕົກຕ່ຳ.
ທ່ານໂທມັສ ເຈຟຊັນ ປະທານາທິບໍດີຜູ້ທີ 3 ຂອງອາເມລິກາເວົ້າວ່າ:ເວລາອາລົມບໍ່ດີ, ກ່ອນຈະອອກປາກຮ້າຍຜູ້ອື່ນ, ໃຫ້ນັບຈາກ 1 ຮອດ 10 ກ່ອນ, ຖ້າຮູ້ສຶກຢາກຮ້າຍແຮງຈົນໜ້າມືດ, ກໍ່ໃຫ້ນັບແຕ່ 1 ຮອດ 100 ກ່ອນ.ເຮັດແນວນີ້ແມ່ນເພື່ອໃຫ້ໃຈເຢັນລົງກ່ອນຈະຮ້າຍຜູ້ອື່ນ, ອົດໄວ້ບຶດໜຶ່ງ, ກໍ່ຈະສາມາດຫຼີກເວັ້ນບໍ່ໃຫ້ເລື່ອງບໍ່ດີເກີດຂຶ້ນ, ສ່ວນເລື່ອງບໍ່ດີນັ້ນ, ບາງທີເປັນເລື່ອງນ້ອຍ, ບາງທີກໍ່ເປັນເຫດການໃຫຍ່.
ຄວາມໃຈຮ້າຍບໍ່ມີຜົນດີຫຍັງຕໍ່ການແກ້ໄຂບັນຫາ, ແມ່ນເລື່ອງທີ່ບໍ່ກຸ້ມຄ່າທີ່ສຸດ, ສະນັ້ນ, ກ່ອນທີ່ທ່ານຈະຮ້າຍຜູ້ໃດຜູ້ໜຶ່ງ, ຂໍໃຫ້ທ່ານໃຊ້ວິທີທີ່ກ່າວມາລອງເບີ່ງ, ຄື ກ່ອນຈະອອກປາກຮ້າຍ, ໃຫ້ນັບແຕ່ 1 ຮອດ 10 ກ່ອນ, ຖ້າຢາກຮ້າຍແຮງ, ກໍ່ໃຫ້ນັບແຕ່ 1 ຮອດ 100 ກ່ອນ, ເພື່ອໃຫ້ຕົນເອງໃຈເຢັນລົງ, ຖ້າເຮັດແນວນີ້ແລ້ວ, ເລື່ອງບາດໃຈຄົນທີ່ບໍ່ຈຳເປັນນັ້ນກໍ່ຈະຫຼຸດໜ້ອຍລົງ, ແລະກໍ່ຈະເຮັດໃຫ້ທ່ານປາສະຈາກການຜິດຖຽງກັນຈົນກະທັ້ງນຳໄປສູ່ຄວາມເຈັບປວດທາງກາຍແລະໃຈ.
