ການຫວນຄືນອະດີດ
ຊີວິດຕົວຈິງໃນວິນາທີທີ່ຜ່ານໄປແລ້ວນັ້ນຈະກາຍເປັນອະດີດໃນວິນາທີຕໍ່ໄປ. ຊີວິດກໍ່ແມ່ນການສ້າງອະດີດຢູ່ຕະຫຼອດ, ແມ່ນບົດບັນທຶກຄວາມຫຼັງຫຼືອະດີດນັ້ນເອງ. ມື້ວານນີ້ກໍ່ແມ່ນຄວາມຫຼັງຂອງມື້ນີ້, ມື້ນີ້ແມ່ນຄວາມຫຼັງຂອງມື້ອື່ນ, ສະນັ້ນ, ຖ້າປະສົບຄວາມຫຼົ້ມເຫຼວແລ້ວ, ກໍ່ຄວນວິເຄາະວ່າ, ເປັນຫຍັງຈຶ່ງຫຼົ້ມເຫຼວ, ຄວນປັບປຸງຫຼືປ່ຽນແປງແນວໃດ, ເພື່ອເຮັດມື້ນີ້ໃຫ້ດີທີ່ສຸດແລະສ້າງອະນາຄົດທີ່ດີໃຫ້ຕົນເອງ.
ການຫວນຄືນອະດີດແມ່ນສິ່ງທີ່ດີ, ໃນເວລາທ່ານເສຍໃຈ, ມັນຈະໃຫ້ກຳລັງໃຈແກ່ທ່ານ, ເຮັດໃຫ້ທ່ານບຸກບືນກ້າວໄປໜ້າ, ແຕ່ມັນກໍ່ຄືກັບເຫຼົ້າ, ດື່ມອຶກໜຶ່ງສອງອຶກຈະຫອມປາກຫອມຄໍ, ແຕ່ຖ້າດື່ມຫຼາຍໂພດ ພັດຈະມີຜົນຮ້າຍຕໍ່ຮ່າງກາຍ. ມີຄົນປຽບການຫວນຄືນອະດີດເປັນເໝືອນທາງລົດໃນແວ່ນເບິ່ງທາງຫຼັງ. ແວ່ນເບິ່ງທາງຫຼັງສຳຄັນຫຼາຍ, ຖ້າບໍ່ມີມັນ, ຜູ້ຂັບລົດອາດຈະຄຶດຢ້ານອັນຕະລາຍ, ເພາະບໍ່ເຫັນວ່າມີຫຍັງຢູ່ເບື້ອງຫຼັງ, ແຕ່ຖ້າເບິ່ງແຕ່ທາງຫຼັງຕະຫຼອດໂດຍບໍ່ເບິ່ງທາງໜ້າ, ກໍ່ຍິ່ງອັນຕະລາຍກວ່າ, ການຕຳກັນໜ້າຕໍ່ໜ້າຍິ່ງຮ້າຍແຮງກວ່າການຕຳທາງຫຼັງ, ຖ້າຄຶດແຕ່ຄວາມຫຼັງບໍ່ເບີ່ງອະນາຄົດ, ຍິ່ງເຮັດໃຫ້ທ່ານຮູ້ສຶກຫງ່ວມເຫງົາເປົ່າປ່ຽວ. ອຸປະສັກໃນອະນາຄົດຍິ່ງເປັນເລື່ອງຈິງກວ່າອຸປະສັກໃນອະດີດ.
