ການຫວນຄືນອະດີດ
ການຫວນຄືນອະດີດເໝືອນດັ່ງຖະໜົນໃນແວ່ນເບິ່ງທາງຫຼັງ, ເຖິງວ່າມັນແມ່ນຄວາມຈິງກໍຕາມ, ແຕ່ພັດໄກຈາກເຮົາໄປເທື່ອລະໜ້ອຍ. ຫົນທາງຕໍ່ໜ້າຍັງຍາວໄກ, ຊີວິດຍັງມີຄວາມຫວັງ, ຍັງຕ້ອງກ້າວຕໍ່ໄປ. ຖ້າຫວນຄືນຄວາມຫຼັງ, ເບິ່ງເປັນບາງຄັ້ງບາງຄາວກໍ່ໄດ້ແລ້ວ, ເພື່ອຖອດຖອນບົດຮຽນ, ຈະເບິ່ງຢູ່ບໍ່ເຊົາແມ່ນບໍ່ໄດ້.
ສຸດທ້າຍ, ວິໄລວັນຈະເລົ່ານິທານພື້ນເມືອງຂອງຈີນສູ່ຟັງ, ຕາມການເລົ່າລືກັນວ່າ, ໃນເວລາຄົນເຮົາຈາກໂລກນີ້ໄປອີກໂລກໜຶ່ງນັ້ນ, ຕ້ອງຜ່ານຂົວແຫ່ງໜຶ່ງ, ຢູ່ເທິງຂົວນີ້ຕ້ອງຫູບນ້ຳແກງຖ້ວຍໜຶ່ງ, ແກງນີ້ຊື່ວ່າ "ແກງເມີ້ງໂພ", ກິນແລ້ວຈະເຮັດໃຫ້ລືມຄວາມມ່ວນຊື່ນ, ຄວາມອຸກອັ່ງ, ຄວາມຄຽດຄວາມຊັງ, ຄວາມຮັກແລະທຸກສິ່ງທຸກຢ່າງໄປໝົດ, ເມື່ອລືມເລື່ອງຕ່າງໆໃນຊາດນີ້ໄປແລ້ວ, ຈຶ່ງຈະສາມາດຜ່ານຂົວນີ້ແລະໄປດຳລົງຊີວິດໃນຊາດໜ້າໄດ້… ອັນນີ້ກໍເປັນພຽງນິທານຊື່ໆ, ແຕ່ວ່າ, ໃນເວລາພົບເລື່ອງທີ່ເຮັດໃຫ້ເຮົາເຈັບປວດໃຈແລ້ວ, ຖ້າມີແກງແບບນີ້ຄືຊິດີເນາະ! ເພາະມັນສາມາດເຮັດໃຫ້ເຮົາລືມຄວາມເຈັບປວດໃນເມື່ອກ່ອນໄປໄດ້ໝົດ. ແຕ່ໃນໂລກນີ້ບໍ່ມີແກງແບບນີ້ດອກ, ມີແຕ່ເຮົາເອງນີ້ລະທີ່ຈະຊ່ວຍຕົນເອງພົ້ນຈາກຄວາມເຈັບປວດໄດ້. ສະນັ້ນ, ໃນເວລາທ່ານໄດ້ປະສົບເລື່ອງບໍ່ດີໃນຊີວິດແລ້ວ, ວິໄລວັນຂໍໃຫ້ທ່ານຈົ່ງພະຍາຍາມລືມມັນໄວທໍ່ໃດຍິ່ງດີ, ກ້າວໄປຂ້າງໜ້າເພື່ອສ້າງອະນາຄົດທີ່ດີກວ່າເກົ່າ, ພົບຄົນທີ່ດີກວ່າເກົ່າ, ແລະປະສົບຜົນສຳເລັດຫຼາຍກວ່າເກົ່າໃນມື້ຕໍ່ໄປ.
