ຄວາມຖ່ອມຕົວ
(GMT+08:00) 2012-05-03 14:19:07 cri
ໃນການຄົບຄ້າສະມາຄົມ, ກໍ່ຕ້ອງຖືທ່າທີຖ່ອມຕົວ. ຂົງຈື້ເວົ້າວ່າ: "ໝູ່ໄປນຳກັນ 3 ຄົນ, ຕ້ອງມີຜູ້ເປັນຄູຂອງຂ້ອຍ". ທຸກຄົນກໍ່ມີຈຸດດີຈຸດເດັ່ນຂອງໃຜລາວທີ່ໃຫ້ຜູ້ອື່ນຮຽນນຳ, ຖ້າບໍ່ມີຈິດໃຈອ່ອນນ້ອມຖ່ອມຕົວ, ກໍ່ບໍ່ຫ່ອນຈະເຫັນຈຸດດີຈຸດເດັ່ນຂອງຜູ້ອື່ນໄດ້. ມີຄົນເວົ້າວ່າ: ຖ້າຢາກມີໝູ່ຫຼາຍໆ, ກໍ່ຕ້ອງຮຽນເປັນຜູ້ຟັງສຽງຜູ້ອື່ນ. ເພາະວ່າ, ທຸກຄົນຕ້ອງການໃຫ້ຜູ້ອື່ນຟັງສຽງຂອງຕົນ, ແລະຢາກໃຫ້ຜູ້ອື່ນເຂົ້າໃຈຕົນເອງ. ແຕ່ຖ້າຢາກເຂົ້າໃຈຜູ້ອື່ນ, ກໍ່ຕ້ອງປະຄວາມເຫັນຂອງຕົນກ່ອນ, ຈົ່ງຊ່ອງຫວ່າງຢູ່ໃນໃຈຂອງຕົນໄວ້ໃຫ້ຜູ້ອື່ນ, ເອົາໃຈໃສ່ຟັງສຽງຜູ້ອື່ນ, ລອງສັງເກດເລື່ອງລາວໃນມຸມຂອງຜູ້ອື່ນ, ຈຶ່ງຈະເຂົ້າໃຈຄວາມຄຶດແລະທັດສະນະຂອງຜູ້ກ່ຽວ. ຖ້າບໍ່ປະທັດສະນະຂອງຕົນ, ໃຊ້ທັດສະນະຂອງຕົນໄປວິຈານຜູ້ອື່ນຢູ່ຕະຫຼອດແລ້ວ, ກໍ່ມີແຕ່ຈະເຮັດໃຫ້ຕົນເອງກາຍເປັນຄົນທີ່ມີໃຈຄັບແຄບ.
ໃນຊີວິດຂອງເຮົາ, ຜົນສຳເລັດທີ່ພວກເຮົາໄດ້ຮັບນັ້ນ, ບາງທີອາດຈະກາຍເປັນສິ່ງທີ່ກີດຂວາງເສັ້ນທາງກ້າວໄປຂ້າງໜ້າຂອງພວກເຮົາ, ຖ້າພວກເຮົາຮູ້ສຶກເພິ່ງພໍໃຈນຳແຕ່ຜົນສຳເລັດທີ່ຕົນໄດ້ຮັບ, ຄຶດວ່າ, ຕົນເອງເຮັດໄດ້ຊ່ຳນີ້ກໍນັບວ່າເກັ່ງຫຼາຍແລ້ວ, ຄວາມຄຶດແນວນີ້ຈະເຮັດໃຫ້ເຮົາຢຸດຈຶ້ງຢູ່ບ່ອນເກົ່າ, ແລ້ວບໍ່ມີຄວາມພະຍາຍາມເພື່ອແນໃສ່ຈຸດໝາຍທີ່ສູງກວ່າເກົ່າ, ເໝືອນດັ່ງຈອກທີ່ເຍັ້ນນ້ຳຊາໃສ່ເຕັມແລ້ວ, ບໍ່ຫ່ອນຕື່ມນ້ຳຊາໃໝ່ໃສ່ໄດ້ອີກ. ແຕ່ວ່າ, ຖ້າພວກເຮົາຫາກປ່ຽນທັດສະນະໃໝ່, ຖືຜົນສຳເລັດທີ່ໄດ້ຮັບນັ້ນເປັນຈຸດເລີ່ມຕົ້ນໃໝ່, ຫາກບໍ່ແມ່ນຈຸດຈົບ, ເຮັດໄດ້ແນວນີ້, ພວກເຮົາກໍ່ຈະກ້າວໜ້າເລື້ອຍໆໄປ, ກໍຄືກັບຈອກນ້ຳຊາຂອງເຮົາ, ມີແຕ່ເຮັດໃຫ້ເປົ່າຫວ່າງເທົ່ານັ້ນ, ມັນຈຶ່ງບັນຈຸນ້ຳຊາໃໝ່ໄດ້ຫຼາຍກວ່າເກົ່າ.
ສະໝອງຂອງຄົນເຮົາມີຄວາມສາມາມຮັບເອົາສິ່ງໃໝ່ໄດ້ຫຼາຍທີ່ສຸດ, ຄວາມສາມາດຖ່າຍເທອັນເກົ່າເພີ່ມຕື່ມອັນໃໝ່ນັ້ນແຂງແຮງທີ່ສຸດ, ພວກເຮົາຄວນປ່ຽນໃໝ່ເລື້ອຍໆ, ຈັ່ງໃດກໍຢ່າເຮັດຄືສາສະດາຈານໃນນິທານເລື່ອງນີ້, ໃນສະໝອງຂອງເຂົາເຕັມໄປແຕ່ຄວາມເພິ່ງພໍໃຈຕໍ່ຕົນເອງ, ຖ້າເປັນດັ່ງນັ້ນ, ນ້ຳຊາແນວໃດກໍເຍັ້ນໃສ່ບໍ່ໄດ້ອີກແລ້ວ, ຜົນສຸດທ້າຍກໍ່ຈະມີແຕ່ເຮັດໃຫ້ຕົນເອງຢຸດສະງັກ, ບໍ່ກ້າວໜ້າອີກ. ສຸພາສິດຈີນກ່າວໄວ້ວ່າ: "ຄວາມອວດເກັ່ງຈອງຫອງ, ນຳເອົາຄວາມເສຍຫາຍມາໃຫ້. ຄວາມຖ່ອມຕົວນຳເອົາຜົນປະໂຫຍດມາໃຫ້". ລອງດຳລົງຊີວິດດ້ວຍຄວາມນອບນ້ອມຖ່ອມຕົວ, ເຊື່ອວ່າ, ທ່ານຈະໄດ້ຮັບສິ່ງທີ່ມີປະໂຫຍດຫຼາຍກວ່າເກົ່າ!
ຢ່າງໃດກໍ່ຕາມ... 3 ຄົນທີ່ຈະພົບກັນບົນເສັ້ນທາງແຫ່ງຄວາມຮັກ...
