ສະບາຍດີວັນແມ່
"ແມ່" ເປັນຄຳເອີ້ນທີ່ເຮັດໃຫ້ຜູ້ຍິງທຸກຄົນຮູ້ສຶກອວດອົ່ງທະນົງໃຈແລະພາກພູມໃຈ, "ຄວາມຮັກຂອງແມ່" ແມ່ນຄວາມຮັກທີ່ຍິ່ງໃຫຍ່ແລະບໍ່ເຫັນແກ່ຕົວທີ່ສຸດໃນໂລກ, ສ່ວນ "ສະຫຼະ" ກໍ່ແມ່ນຄຳສັບທີ່ໃຊ້ຫຼາຍທີ່ສຸດສຳລັບບັນລະຍາຍແມ່, ນັບແຕ່ຂະນະທີ່ລູກອອກມາເຫັນໂລກນີ້, ແມ່ກໍ່ເລີ່ມທຸ້ມເທກຳລັງໃຈ, ສະຫຼະທຸກສິ່ງທຸກຢ່າງເພື່ອລູກຢ່າງບໍ່ກິນແໜງຈັກເທື່ອ.
ມີຄົນເວົ້າວ່າ: ແມ່ເປັນອາຊີບຊະນິດໜຶ່ງ, ແມ່ນອາຊີບທີ່ບໍ່ມີວັນອອກກິນເບ້ຍບຳນານຂອງຜູ້ຍິງ, ແລະກໍ່ບໍ່ມີເງິນເດືອນ, ບໍ່ມີມື້ພັກ. ຕັ້ງແຕ່ລູກເກີດມາ, ຮອດລູກເຂົ້າໂຮງຮຽນ, ຮຽນຈົບແລ້ວໄປເຮັດວຽກ, ຈົນຮອດລູກແຕ່ງງານ, ເກີດລູກຂອງຕົນ——ໃນເວລາທີ່ດົນນານນີ້, ຄວາມຮັກຂອງແມ່ຢູ່ຄຽງຂ້າງລູກຕະຫຼອດ. ຢູ່ຕາມເສັ້ນທາງແຫ່ງຊີວິດທີ່ຄົດໆລ້ຽວໆ, ແມ່ໄດ້ໃຫ້ຄວາມເອົາໃຈໃສ່ທີ່ຈິງໃຈແລະຄວາມອົບອຸ່ນທີ່ສຸດໃຫ້ພວກເຮົາ, ແມ່ຢ້ານລູກໜາວ, ຢ້ານລູກຮ້ອນ, ໄດ້ສະຫຼະເວລາໃຫ້ລູກໂດຍບໍ່ເຄີຍເຫັນແກ່ໂຕຈັກເທື່ອ, ແມ່ໄດ້ສອນຄວາມຮູ້ກ່ຽວກັບການຄົບຄ້າສະມາຄົມໃຫ້ພວກເຮົາຢ່າງບໍ່ຮູ້ອິດຮູ້ເມື່ອຍ, ເລື່ອງເລັກໆນ້ອຍໆຂອງພວກເຮົາກໍ່ແມ່ນເລື່ອງໃຫຍ່ສຳລັບເພິ່ນ. ຄວາມຮັກຂອງແມ່ນຄວາມຮັກທີ່ບໍ່ເຫັນແກ່ຕົວ, ແມ່ນຄວາມຮັກທີ່ບໍ່ເຄີຍຢຸດເຊົາຈັກເທື່ອ. ວິໄລວັນຄຶດວ່າ, ເຖິງຈະແມ່ນກະວີທີ່ຍິ່ງໃຫຍ່ທີ່ສຸດ, ແລະດົນຕີທີ່ມ່ວນທີ່ສຸດໃນໂລກ ກໍ່ບໍ່ສາມາດບັນລະຍາຍຄວາມຮັກຂອງແມ່ຢ່າງເຖິງຖອງໄດ້.
ວັນເວລາຜ່ານໄປ, ລູກຈະຄ່ອຍໆເຕີບໃຫຍ່ຂຶ້ນ, ແຕ່ແມ່ພັດນັບມື້ນັບເຖົ້າລົງ, ເພື່ອນເອີຍ, ທ່ານເຄີຍສັງເກດເຫັນຮອຍຫຍູ່ຢູ່ໜ້າຜາກແລະຜົມຫງອກເທິງຫົວຂອງແມ່ບໍ່? ສິ່ງເຫຼົ່ານີ້, ລ້ວນແຕ່ແມ່ນສັນຍະລັກແຫ່ງຄວາມຮັກຂອງແມ່.
ວັນອາທິດທີສອງຂອງເດືອນພຶດສະພາທຸກປີແມ່ນວັນແມ່ຂອງຫຼາຍປະເທດ, ບໍ່ວ່າປະເທດຂອງທ່ານມີວັນແມ່ຫຼືບໍ່, ຂໍໃຫ້ທ່ານຖືວັນນີ້ເປັນໂອກາດເພື່ອສະແດງຄວາມຮັກແລະຄວາມຂອບໃຈຕໍ່ແມ່, ໂທລະສັບໄປຫາເພິ່ນແດ່, ຫຼືວ່າຊື້ດອກໄມ້ໃຫ້ເພິ່ນແດ່, ແຕ່ງກິນໃຫ້ເພິ່ນແດ່, ເວົ້ານຳເພິ່ນວ່າ: "ສະບາຍດີ, ວັນແມ່!" … ເຖິງວ່າ ສິ່ງເຫຼົ່ານີ້ແມ່ນເລື່ອງນ້ອຍໆ, ແຕ່ກໍ່ສາມາດເຮັດໃຫ້ແມ່ຮູ້ສຶກອົບອຸ່ນໃຈທີ່ສຸດ. ນະທີ່ນີ້, ວິໄລວັນກໍ່ຂໍໃຫ້ຜູ້ເປັນແມ່ທຸກຄົນຈົ່ງສະບາຍດີວັນແມ່, ມີສຸຂະພາບແຂງແຮງ, ທັງໜຸ່ມທັງງາມຕະຫຼອດໄປ!
ນັກຂ່າວເມື່ອຍທີ່ສຸດໃນໂລກ... ຜົມຍາວ...
