ຈັດເວທີປຶກສາຫາລືການຄ້າການລົງທຶນຈີນລາວ
(ໄຂເວທີປຶກສາຫາລືການຄ້າການລົງທຶນຈີນລາວ)
ເວທີປຶກສາຫາລືການຄ້າການລົງທຶນຈີນລາວໄດ້ໄຂຂຶ້ນຢູ່ນະຄອນນານນິງເຂດກວາງຊີເຜົ່າຈ້ວງປົກຄອງຕົນເອງໃນຕອນບ່າຍວັນທີ 22 ກັນຍານີ້.ເຈົ້າຫນ້າທີ່ປະເທດລາວກ່າວວ່າ, ປະເທດລາວເອົາໃຈໃສ່ນຳການສົ່ງເສີມການລົງທຶນຈາກປະເທດຈີນ, ຫວັງວ່າທ່າອຽງທີ່ດີໃນການພັດທະນາເສດຖະກິດການຄ້າລະຫວ່າງຈີນລາວສາມາດສືບຕໍ່ໄປໄດ້.ຕໍ່ໄປເຊີນຟັງການແຈ້ງຂ່າວຈາກບຸນຕາ, ນັກຂ່າວ cri ທີ່ສົ່ງມາຈາກະຄອນນານນິງ.
ນັບແຕ່ສປປລາວດຳເນີນການເປີດປະຕູສູ່ສາກົນເມື່ອປີ 1988 ເປັນຕົ້ນມາ, ໂຄງການທີ່ຈີນລົງທຶນຢູ່ປະເທດລາວ ໄດ້ມີເຖິງ 755 ໂຄງການແລ້ວ, ເຊິ່ງລວມຍອດມູນຄ່າການລົງທຶນມີເຖິງ 3 ຕື້ 700 ລ້ານກວ່າໂດລາ, ປັດຈຸບັນ, ວິສາຫະກິດຈີນທີ່ໄປລົງທຶນຢູ່ລາວໄດ້ເປັນອັນດັບຫນຶ່ງໃນບັນດາການລົງທຶນຂອງຕ່າງປະເທດຢູ່ປະເທດລາວ. ໃນເວທີປຶກສາຫາລືເທື່ອນີ້, ທ່ານສົມຫວັງ ນິນທາວົງ, ລັດຖະມົນຕີຊ່ວຍວ່າການກະຊວງອຸດສາຫະກຳແລະການຄ້າລາວໄດ້ແນະນຳໃຫ້ຮູ້ເຖິງນະໂຍບາຍພິເສດຂອງປະເທດລາວໃນການສົ່ງເສີມການລົງທຶນຂອງຕ່າງປະເທດ.ທ່ານສົມຫວັງເວົ້າວ່າ:
ເພື່ອເຮັດໃຫ້ການລົງທຶນຕ່າງປະເທດໄດ້ດີກວ່າເກົ່າ, ລັດຖະບານຂອງພວກຂ້າພະເຈົ້າໄດ້ເອົາໃຈໃສ່ປັບປຸງນະໂຍບາຍການສົ່ງເສີມການລົງທຶນ,ເປັນຕົ້ນລະບຽບກົດຫມາຍແລະຂັ້ນຕອນການປະຕິບັດການລົງທຶນ.ການປັບປຸງອັນນີ້ກໍ່ແມ່ນແນໃສ່ໃຫ້ມີຄວາມວ່ອງໄວຂຶ້ນໃນການບໍລິການຜ່ານປະຕູດຽວມີຄວາມໂປ່ງໃສແລະສາມາດຈັດຕັ້ງປະຕິບັດອຳນວຍຄວາມສະດວກໃຫ້ແກ່ຜູ່ຈະມາລົງທຶນໃນອະນາຄົດ.ລັດຖະບານໄດ້ປະກາດໃຊ້ກົດຫມາຍການສົ່ງເສີມການລົງທຶນສະບັບໃຫມ່ ເຊິ່ງໄດ້ປັບປຸງໃນປີ 2009 ມານີ້,ພ້ອມກັບສ້າງດຳລັດໃນການປະຕິບັດກົດຫມາຍດັ່ງກ່າວເປັນທີ່ຮຽບຮ້ອຍແລ້ວ.ສະນັ້ນ ຂໍໃຫ້ນັກລົງທຶນຈີນເຊື່ອຫມັ້ນວ່າການລົງທຶນຢູ່ໃນລາວມີຄວາມສະດວກແລະເງື່ອນໄຂ ໃນການຂໍອະນຸມັດການລົງທຶນ.ຍ້ອນປະເທດລາວມີຊັບພະຍາກອນທຳມະຊາດ,ແລະເປັນຈຸດເຊື່ອມຈອດໃນພາກພື້ນ, ສຳຄັນອີກອັນຫນຶ່ງ,ພວກຂ້າພະເຈົ້າຖືວ່າລະບອບການເມືອງທີ່ມີຄວາຫມັ້ນຄົງສະງົບແລະປອດໄພກໍ່ເປັນອັນສະດວກອັນຫນຶ່ງ.ສະນັ້ນ, ຂ້າພະເຈົ້າເຊື່ອວ່າບັນດາທ່ານທີ່ເຂົ້າຮ່ວມກອງປະຊຸມໃນມື້ນີ້ ຈະມີກາລະໂອກາດໃນການແລກປ່ຽນຄວາມຄິດຄວາມເຫັນເພື່ອໄປລົງທຶນຢູ່ສປປລາວ.
