ງານຖະແຫຼງຂ່າວກ່ຽວກັບນາຍົກລັດຖະມົນຕີຈີນຈະເດີນທາງໄປອຸສເບກີສະຖານເຂົ້າຮ່ວມກອງປະຊຸມຄັ້ງທີ 12 ຂອງນາຍົກລັດຖະມົນຕີປະເທດສະມາຊິກອົງການຮ່ວມມືຊຽງໄຮ
2013-11-20 18:42:05 cri
ວັນທີ 20 ພະຈິກນີ້, ກະຊວງການຕ່າງປະເທດຈີນໄດ້ຈັດງານຖະແຫຼງຂ່າວຕໍ່ສື່ມວນຊົນທັງພາຍໃນແລະຕ່າງປະເທດກ່ຽວກັບທ່ານຫຼີເຄີ້ສ໋ຽງ ນາຍົກລັດຖະມົນຕີຈີນຈະເດີນທາງໄປອຸສເບກີສະຖານເພື່ອເຂົ້າຮ່ວມກອງປະຊຸມຄັ້ງທີ 12 ຂອງນາຍົກລັດຖະມົນຕີປະເທດສະມາຊິກອົງການຮ່ວມມືຊຽງໄຮ. ທ່ານເສິງໂກວຜິງ ລັດຖະມົນຕີຊ່ວຍວ່າການກະຊວງການຕ່າງປະເທດຈີນ ໄດ້ແຈ້ງສະພາບການທີ່ກ່ຽວຂ້ອງວ່າ, ທ່ານຫຼີເຄີ້ສ໋ຽງ ນາຍົກລັດຖະມົນຕີຈີນຈະປະກອບຄຳຄິດຄຳເຫັນຢູ່ໃນກອງປະຊຸມຄັ້ງນີ້ໂດຍສະຫຼຸບໝາກຜົນແລະບົດຮຽນດ້ານການຮ່ວມມືຕົວຈິງລະຫວ່າງປະເທດສະມາຊິກອົງການຮ່ວມມືຊຽງໄຮ, ແລະສະເໜີຂໍ້ລິເລີ່ມດ້ານການຮ່ວມມືທີ່ມີລັກສະນະຊີ້ນຳ,ມີຜົນສັກສິດຍາວນານແລະມີຄວາມສາມາດປະຕິບັດໄດ້. ຄາດວ່າ, ໃນໄລຍະດຳເນີນກອງປະຊຸມນາຍົກລັດຖະມົນຕີໃນຄັ້ງນີ້ຈະເຊັນສັນຍາວ່າດ້ວຍການເພີ່ມຄວາມສະດວກດ້ານການຂົນສົ່ງທາງບົກສາກົນລະຫວ່າງລັດຖະບານປະເທດສະມາຊິກອົງການຮ່ວມມືຊຽງໄຮ. ໃນໄລຍະກອງປະຊຸມໃນຄັ້ງນີ້, ທ່ານຫຼີເຄີ້ສ໋ຽງຍັງຈະພົບປະກັບຜູ້ນຳອຸສເບກີສະຖານແລະຜູ້ນຳຂອງປະເທດທີ່ກ່ຽວຂ້ອງທີ່ເຂົ້າຮ່ວມກອງປະຊຸມ,ເພື່ອແລກປ່ຽນຄວາມເຫັນກ່ຽວກັບການພົວພັນລະຫວ່າງສອງຝ່າຍແລະບັນຫາທີ່ມີຄວາມສົນໃຈຮ່ວມກັນ.
