ຕາມຂ່າວCRI: ຕອນບ່າຍວັນທີ 21 ພະຈິກນີ້, ຢູ່ຫໍສະພາປະຊາຊົນຈີນທີ່ນະຄອນຫຼວງປັກກິ່ງ, ທ່ານຫຼີເຄີ້ສ໋ຽງ ນາຍົກລັດຖະມົນຕີຈີນ ກັບທ່ານເຮີແມນ ວານ ໂຣມປຸຍ ປະທານສະພາມົນຕີເອີລົບ ແລະ ທ່ານມານົວ ດູຣາວ ບາໂຣໂຊ ປະທານຄະນະກຳມາທິການສະຫະພາບເອີລົບໄດ້ພ້ອມກັນພົບປະນັກຂ່າວ, ເພື່ອແຈ້ງຜົນການພົບປະລະຫວ່າງຜູ້ນຳຈີນ-ສະຫະພາບເອີລົບຄັ້ງທີ 16.
ຜົນການພົບປະທີ່ຜູ້ນຳຈີນ-ສະຫະພາບເອີລົບໄດ້ບັນລຸຮ່ວມກັນ ມີຄື: ໜຶ່ງ, ປະກາດ"ແຜນການຍຸດທະສາດການຮ່ວມມືຈີນ-ເອີລົບ2020", ແຜນການສະບັບນີ້ໄດ້ກາມເອົາຫຼາຍຂົງເຂດກວ້າງຂວາງທີ່ສຸດ ແບບບໍ່ເຄີຍມີມາກ່ອນ, ສາມາດເວົ້າໄດ້ວ່າ "ຂຶ້ນສູ່ທ້ອງຟ້າລົງໄປທະເລ ແລະ ເຂົ້າໄປໃນພື້ນດິນ". ສອງ, ປະກາດຢ່າງເປັນທາງການວ່າຈະເລິ່ມຈັດການເຈລະຈາກ່ຽວກັບອະນຸສັນຍາການລົງທຶນຈີນ-ເອີລົບ. ສາມ, ຕັ້ງໜ້າປຶກສາຫາລືຄົ້ນຄວ້າສ້າງເຂດການຄ້າເສລີ, ຮອດປີ 2020 ພະຍາຍາມເຮັດໃຫ້ມູນຄ່າການຄ້າບັນລຸຮອດ 1000 ຕື້ໂດລາ. ສີ, ເຮັດໃຫ້ການແລກປ່ຽນດ້ານວັດທະນະທຳມີຄວາມແໜ້ນແຟ້ນຂຶ້ນເກົ່າກວ່າ, ເລັ່ງລັດຫາລືສັນຍາກ່ຽວກັບການອຳນວຍຄວາມສະດວກໃຫ້ແກ່ການໄປມາຫາສູ່ກັນຂອງປະຊາຊົນ, ເພິ່ມທະວີການສົນທະນາດ້ານນະໂຍບາຍສາທາລະນະ. ຫ້າ, ເພິ່ມທະວີການແລກປ່ຽນ ແລະ ການປະສານງານໃນວຽກງານສາກົນ ແລະ ພາກພື້ນ.
ທ່ານຫຼີເຄີ້ສ໋ຽງຫວັງວ່າ, ສອງຝ່າຍຈະກຳ "ພວງມາໄລ" ຂອງການພົວພັນລະຫວ່າງສອງຝ່າຍໃຫ້ດີຢ່າງສະເໝີຕົ້ນສະເໝີປາຍ, ຊຸກຍູ້ການພົວພັນໝູ່ຄູ່ຍຸດທະສາດຮອບດ້ານລະຫວ່າງຈີນ ກັບ ສະຫະພາບເອີລົບໄດ້ມີການຂະຫຍາຍໄປໜ້າຢ່າງໝັ້ນທ່ຽງ ແລະ ປອດໃສເປັນເວລາຍາວນານ.
