ຕອນບ່າຍວັນທີ 21 ພະຈິກນີ້, ຢູ່ຫໍສະພາປະຊາຊົນທີ່ນະຄອນຫຼວງປັກກິ່ງ, ທ່ານຫຼີເຄີ້ສ໋ຽງ ນາຍົກລັດຖະມົນຕີຈີນ ກັບ ທ່ານເຮີແມນ ວານ ໂຣມປຸຍ ປະທານສະພາມົນຕີເອີລົບ ແລະ ທ່ານມານົວ ດູຣາວ ບາໂຣໂຊ ປະທານຄະນະກຳມາທິການສະຫະພາບເອີລົບໄດ້ພ້ອມກັນເຂົ້າຮ່ວມ ແລະ ໄດ້ກ່າວຄຳປາໄສຢູ່ກອງປະຊຸມເວທີປຶກສາຫາລືການພົວພັນໝູ່ຄູ່ກ່ຽວກັບການຫັນເປັນຕົວເມືອງຈີນ-ເອີລົບ .
ທ່ານຫຼີເຄີ້ສ໋ຽງກ່າວວ່າ, ກອງປະຊຸມເວທີປຶກສາຫາລືການພົວພັນໝູ່ຄູ່ກ່ຽວກັບການຫັນເປັນຕົວເມືອງຈີນ-ເອີລົບ ໄດ້ເລິ່ມຈັດຂຶ້ນໃນໜຶ່ງປີກ່ອນ, ປັດຈຸບັນໄດ້ຂະຫຍາຍຮອດຂະໜາດທີ່ມີບຸກຄົນວົງການການເມືອງ, ວົງການທຸລະກິດ ແລະ ວົງການວິຊາການຂອງສອງຝ່າຍພັນກວ່າຄົນເຂົ້າຮ່ວມຢ່າງຫ້າວຫັນ, ນີ້ໄດ້ສະແດງໃຫ້ເຫັນຢ່າງເຕັມທີ່ວ່າ, ຢູ່ລະຫວ່າງຈີນກັບເອີລົບມີກຳລັງບົ່ມຊ້ອນຫຼາຍໃນດ້ານການຮ່ວມມືຫັນເປັນຕົວເມືອງແບບໃໝ່, ຍ່ອມຈະກາຍເປັນເສົາຄ້ຳສຳຄັນໃນການຮ່ວມມືລະຫວ່າງຈີນ ກັບ ເອີລົບ.
ທ່ານວານ ໂຣມປຸຍ ແລະ ທ່ານບາໂຣໂຊກ່າວວ່າ, ການພົບປະຜູ້ນຳສະຫະພາບເອີລົບ-ຈີນຄັ້ງທີ 16 ໄດ້ສ້າງພື້ນຖານອັນໝັ້ນແກ່ນໃຫ້ແກ່ການສ້າງສັງກາດໃໝ່ຂອງການພົວພັນສະຫະພາບເອີລົບ-ຈີນ. ການຮ່ວມມືຫັນເປັນຕົວເມືອງແມ່ນພາກສ່ວນສຳຄັນຂອງການພົວພັນເອີລົບ-ຈີນ, ມີຜົນສະທ້ອນອັນເລິກເຊິ່ງຍາວໄກ, ມີຜົນດີຕໍ່ການຍົກສູງລະດັບຊີວິດການເປັນຢູ່ຂອງປະຊາຊົນສອງຝ່າຍ, ຊຸກຍູ້ການພັດທະນາແບບຍືນຍົງ ແລະ ຈະເລີນຮຸ່ງເຮືອງຮ່ວມຂອງສອງຝ່າຍ. ຝ່າຍສະຫະພາບເອີລົບຍິນດີດຳເນີນການຮ່ວມມືເປັນເວລາຍາວນານ, ຕິດແທດຕິວຈິງ ແລະ ມີປະສິດທິຜົນກັບຝ່າຍຈີນໃນຂົງເຂດນີ້.
