ການອວຍພອນປີໃໝ່ ຊຶ່ງເປັນກິດຈະກຳຂອງຊາວຈີນໃນການສະຫຼອງບຸນກຸດຈີນທີ່ມີມາແຕ່ດົນແລ້ວ, ປັດຈຸບັນ ຍ້ອນມີການໃຊ້ວິຈັດທາງອິນເຕີເນັດກໍໄດ້ເພີ່ມບັນຍາກາດມ່ວນຊື່ນທີ່ຕ່າງກັບແຕ່ກ່ອນ.
ວັນທີ 30 ມັງກອນນີ້ແມ່ນມື້ສົ່ງທ້າຍປີເກົ່າຕ້ອນຮັບປີໃໝ່ຕາມຈັນທະຄະຕິຈີນ, ຮອດປັດຈຸບັນ ກິດຈະກຳອວຍພອນປີໃໝ່ກໍເລີ່ມເຂົ້າສູ່ບັນຍາກາດຄຶກຄື້ນມ່ວນຊື່ນເຖິງຈຸດສູງສຸດແລ້ວ. ດຽວນີ້ ຄົນທັງຫຼາຍນິຍົມກັນນຳໃຊ້ເຄືອຂ່າຍອິນເຕີເນັດເຄື່ອນທີ່ ຄືໃຊ້ວິຈັດສົ່ງຄວາມອວຍພອນປີໃໝ່ບຸນກຸດຈີນຊຶ່ງກັນແລະກັນ ກໍກາຍເປັນທາງເລືອກໃໝ່ແລ້ວ.
ການໃຊ້ວິຈັດສົ່ງຄວາມອວຍພອນປີໃໝ່ໄດ້ຮັບຄວາມນິຍົມສູງ,ສາເຫດສ່ວນໜຶ່ງແມ່ນຍ້ອນວ່າ ໃນທາງວິຈັດມີເນື້ອໃນອວຍພອນຫຼາຍຢ່າງ,ມີເອກະລັກສະເພາະຕົວຫຼາຍ. ທ້າວວັງເພີງເຟີຍ, ນັກສຶກສາມະຫາວິທະຍາໄລການເມືອງແລະກົດໝາຍຈີນບອກນັກຂ່າວວ່າ, ເມື່ອລາວສົ່ງຂໍ້ຄວາມວິຈັດອວຍພອນປີໃໝ່ຫຼາຍຂໍ້ໃຫ້ໝູ່ ມັກຕື່ມໃສ່ວິດີໂອຫຼືພາບ, ຕາມປົກກະຕິ ການສົ່ງຂໍ້ຄວາມສັ້ນທຳມະດາແມ່ນຍາກທີ່ຈະເຮັດໄດ້ຄືແນວນີ້.
ນອກນີ້,ວິທີການສື່ສານກັນທາງວິຈັດແມ່ນສາມາດລົມກັນແບບສອງຕໍ່ສອງ,ຄົນໜຶ່ງຕໍ່ຫຼາຍຄົນ,ຫຼືຫຼາຍຄົນລົມຮ່ວມກັນ,ມີຄວາມຄ່ອງແຄ້ວສະບາຍກວ່າ,ແລະມີບັນຍາກາດຄຶກຄື້ນກວ່າ, ອີກດ້ານໜຶ່ງຍ້ອນວ່າ ການໃຊ້ວິທີນີ້ປະຢັດກວ່າການໃຊ້ຂໍ້ຄວາມສັ້ນ,ຫຼາຍໆຄົນຈຶ່ງໄດ້ເລືອກເອົາການໃຊ້ວິຈັດອວຍພອນປີໃໝ່ແກ່ກັນ.
ແຕ່ເຖິງວ່າການໃຊ້ວິຈັດໄດ້ຮັບຄວາມນິຍົມສູງໃນເວລາບຸນກຸດຈີນໃນການອວຍພອນປີໃໝ່ປີມະເມຍກໍຕາມ,ແຕ່ການໂທລະສັບ,ສົ່ງຂໍ້ຄວາມສັ້ນແລະວິທີເກົ່າອື່ນໆກໍໄດ້ຮັບຄວາມນິຍົມຈາກຜູ້ຄົນສ່ວນໜຶ່ງເຊັ່ນດຽວກັນ.
ຕໍ່ຮູບການອວຍພອນປີໃໝ່ຂອງຈີນທີ່ຈາກການໂທລະສັບແລະສົ່ງຂໍ້ຄວາມສັ້ນປ່ຽນເປັນການໃຊ້ວິຈັດທາງອິນເຕີເນັດດັ່ງກ່າວນີ້,ທ່ານກົ່ວຊີ້ງກວ່າງ, ສາສະດາຈານຂອງສະຖາບັນຂ່າວແລະສື່ມະຫາວິທະຍາໄລຊິ່ນຮວາກ່າວວ່າ, ສິ່ງທີ່ປ່ຽນແປງແມ່ນສື່ກາງ, ສິ່ງທີ່ບໍ່ປ່ຽນແປງນັ້ນແມ່ນປະເພນີອວຍພອນປີໃໝ່. ຊາວຈີນເອົາໃຈໃສ່ມິດຕະພາບນັ້ນບໍ່ໄດ້ມີປ່ຽນແປງແຕ່ຢ່າງໃດ.
 |
