ບຸນກຸດຈີນແມ່ນບຸນປະເພນີທີ່ມີສີສັນພິເສດຫຼາຍທີ່ສຸດຂອງຈີນ. ວັນທີ 31 ມັງກອນນີ້ແມ່ນມື້ອອກໃໝ່ຄຳໜຶ່ງເດືອນຈຽງຄືວັນຂຶ້ນປີໃໝ່ກຸດຈີນ, ປະຊາຊົນຢູ່ແຫ່ງຕ່າງໆຂອງຈີນກຳລັງສະເຫຼີມສະຫຼອງບຸນປະເພນີສຳຄັນທີ່ສຸດດັ່ງກ່າວດ້ວຍຫຼາຍຮູບຫຼາຍສີ. ພ້ອມກັນນັ້ນ, ຍ້ອນເປັນຫ່ວງວ່າການຈູດດອກໄມ້ບັ້ງໄຟແລະໝາກກະໂພກຈະເຮັດໃຫ້ມີມົນລະພິດທາງອາກາດຫຼາຍກວ່າເກົ່າ, ມີປະຊາຊົນຈຳນວນຫຼວງຫຼາຍຈຶ່ງບໍ່ໄດ້ຈູດດອກໄມ້ບັ້ງໄຟແລະໝາກກະໂພກຫຼືຈູດໃຫ້ໜ້ອຍ, ການອະນຸລັກສິ່ງແວດລ້ອມກໍ່ໄດ້ກາຍເປັນຫົວຂໍ້ໜຶ່ງຂອງບຸນກຸດຈີນໃນປີນີ້.
ສຳລັບຄົນຈີນແລ້ວ, ຄວາມໝາຍຂອງບຸນກຸດຈີນແມ່ນສະມາຊິກໃນຄອບຄົວເຕົ້າໂຮມກັນ, ອາກາດໜາວເປັນແລະຊື້ປີ້ກັບບ້ານຍາກກໍບໍ່ສາມາດສະກັດກັ້ນບາດກ້າວກັບບ້ານຂອງຄົນທີ່ເຮັດວຽກຢູ່ຕ່າງແຂວງ. ຕາມສະຖິຕິທາງການ, ໃນໄລຍະຂົນສົ່ງຜູ້ໂດຍສານຍາມບຸນກຸດຈີນປີ 2014 ຈະມີ 3 ຕື້ 600 ລ້ານເທື່ອຄົນຈະເດີນທາງກັບບ້ານດ້ວຍຍວດຍານພາຫະນະຕ່າງໆເພື່ອສະຫຼອງບຸນກຸດຈີນ.
ໃນໄລຍະບຸນກຸດຈີນ, ແຫ່ງຕ່າງໆຂອງຈີນຍັງໄດ້ຈັດກິດຈະກຳວັດທະນະທຳທີ່ມີຫຼາຍຮູບຫຼາຍສີ. ໃນກິດຈະກຳບຸນວັດທີ່ຈັດຂຶ້ນໃນຮົ່ມແຫ່ງໜຶ່ງຂອງປັກກິ່ງ, ນາງເລຕັນທີ່ມາຈາກນະຄອນຫຼວງວໍຊິງຕັນຂອງອາເມລິກາທັງຊົມການສະແດງຮີດຄອງປະເພນີປັກກິ່ງທັງກິນໝາກໄມ້ໂອບນ້ຳຕານ, ໃນເວລາເວົ້າເຖິງຮີດຄອງປະເພນີສະຫຼອງບຸນກຸດຈີນຂອງປັກກິ່ງ, ນາງຮູ້ສຶກຕື່ນເຕັ້ນໃຈທີ່ສຸດ, ນາງກ່າວວ່າ:
"ການສະແດງເຫຼົ່ານີ້ໜ້າຮັກຫຼາຍ, ແລະໜ້າສົນໃຈຫຼາຍ. ການສະແດງຫຼາຍຢ່າງໄດ້ສະແດງໃຫ້ເຫັນວັດທະນະທຳປີໃໝ່ຈີນແລະການເຄື່ອນໄຫວບັນເທິງຂອງປີໃໝ່, ດີຫຼາຍ."
ໃນແນວຄິດດັ້ງເດີມຂອງຄົນຈີນ, ຖ້າບໍ່ຈູດດອກໄມ້ໄຟແລະໝາກກະໂພກກໍ່ບໍ່ສົມວ່າການຫຼິ້ນບຸນກຸດຈີນ, ແຕ່ວ່າສະພາບການໃນປີນີ້ຫາກປ່ຽນແປງແລ້ວ. ຄຽງຄູ່ກັບປະຊາຊົນທັງຫຼາຍນັບມື້ນັບເອົາໃຈໃສ່ນຳສະພາບແວດລ້ອມ, ຫຼາຍຄົນເລືອກການບໍ່ຈູດໝາກກະໂພກຫຼືຈູດໜ້ອຍໜຶ່ງເທົ່ານັ້ນ.
ການສຳຫຼວດເທື່ອໜຶ່ງກ່ອນບຸນກຸດຈີນສະແດງໃຫ້ເຫັນວ່າ, ຊາວໜຸ່ມໃນຕົວເມືອງໃຫຍ່, ຫຼາຍກວ່າ 60% ເຫັນດີຈູດໝາກກະໂພກໜ້ອຍ, ມີປະມານ 1 ສ່ວນ 4 ສະແດງວ່າຈະບໍ່ຊື້ດອກໄມ້ໄຟຫຼືໝາກກະໂພກ. ຍ້ອນວ່າປະຊາຊົນຈູດດອກໄມ້ໄຟແລະຈູດໝາກກະໂພກໃຫ້ໜ້ອຍຢ່າງເປັນເຈົ້າການ, ໃນບຸນກຸດຈີນປີ 2014 ບໍ່ໄດ້ເກີດສະພາບການທີ່ມີຟຸ່ນລະອອງຂະຫຍາຍ PM 2.5 ຫຼາຍເກີນໄປ, ລະດັບຄວາມເຂັ້ມຂຸ້ນຂອງມົນລະພິດສູງສຸດແມ່ນລະດັບກາງຫຼືລະດັບຕ່ຳ, ຕ່ຳກວ່າປີກາຍນີ້ຫຼາຍ.
ທ່ານຟ່າງລີ້, ຫົວໜ້າກົມອະນຸລັກສິ່ງແວດລ້ອມປັກກິ່ງກ່າວວ່າ, ການອະນຸລັກສິ່ງແວດລ້ອມກຳລັງກາຍເປັນຄວາມຮັບຮູ້ທີ່ເປັນເອກະສັນກັນຂອງທົ່ວສັງຄົມຂອງປະເທດຈີນ. ທ່ານກ່າວວ່າ:
"ປີນີ້ພວກເຮົາໄດ້ເຫັນວ່າ, ນັກທຸລະກິດທີ່ຂາຍດອກໄມ້ໄຟໜ້ອຍກວ່າເກົ່າແລ້ວ, ດອກໄມ້ໄຟທີ່ນັກທຸລະກິດກະກຽມຈຳໜ່າຍກໍຫຼຸດໜ້ອຍ. ເລື່ອງນີ້ຍ້ອນວ່າປະຊາຊົນປັກກິ່ງທັງຫຼາຍສົນໃຈນຳຄຸນນະພາບຂອງອາກາດ, ແລະຄວາມຮູ້ກ່ຽວກັບການຈູດບັ້ງໄຟແລະຈູດໝາກກະໂພກຈະສ້າງມົນລະພິດທາງອາກາດ. ປັດຈຸບັນ, ການເຮັດໃຫ້ອາກາດສະອາດແລະຄຸ້ມຄອງ ມົນລະພິດທາງອາກາດແມ່ນຄວາມຮັບຮູ້ທີ່ເປັນເອກະສັນກັນຂອງທົ່ວສັງຄົມຈີນ, ບໍ່ພຽງແຕ່ແມ່ນລັດຖະບານເປັນຜູ້ນຳພາເທົ່ານັ້ນ."