ກອງປະຊຸມເທື່ອທີ 2 ຂອງສະພາປະຊາຊົນແຫ່ງຊາດຈີນຊຸດທີ 12 ໄດ້ໄຂຂຶ້ນໃນຕອນເຊົ້າວັນທີ 5 ມີນານີ້ຢູ່ຫໍສະພາປະຊາຊົນທີ່ນະຄອນຫຼວງປັກກິ່ງ, ທ່ານຫຼີ້ເຄີ້ສ໋ຽງ ນາຍົກລັດ ຖະມົນຕີຈີນໄດ້ຕາງໜ້າຄະນະລັດຖະບານລາຍງານວຽກງານຂອງລັດຖະບານເປັນຄັ້ງທຳອິດໃນໄລຍະປະຕິບັດໜ້າທີ່ໃນຕຳແໜ່ງຂອງທ່ານ, ແລະຍັງໄດ້ອະທິປາຍໃຫ້ຮູ້ລະອຽດກ່ຽວກັບເນື້ອໃນຕ່າງໆຂອງບົດລາຍງານເຊັ່ນ ເປົ້າໝາຍການເຕີບໂຕດ້ານເສດຖະກິດ, ແຜນງົບປະມານດ້ານການປ້ອງກັນປະເທດ, ການປະຕິບັດມາດຕະການປະຕິຮູບແລະອື່ນໆ.
ສຳນັກຂ່າວສານລອຍເຕີຂອງອັງກິດລາຍງານໃນວັນທີ 5 ມີນານີ້ວ່າ, ຜ່ານຈາກບົດລາຍງານວຽກງານລັດຖະບານ,ລັດຖະບານຈີນໄດ້ສົ່ງສັນຍານແຮງ ທີ່ສຸດນັບມາຮອດປັດຈຸບັນ, ຊຶ່ງສະແດງໃຫ້ເຫັນວ່າເສດຖະກິດຈີນຈະຫັນໄປສູ່ການເນັ້ນໃສ່ການພັດທະນາຢ່າງດຸ່ນດ່ຽງແລະເປັນມິດກັບສິ່ງແວດລ້ອມ,ແລະກ່າວປະກາດຈະຕໍ່ຕ້ານກັບບັນຫາການສ້າງມົນລະພິດຕໍ່ສິ່ງແວດລ້ອມ.
ໜັງສືພິມ wall street journal ຂອງອາເມລິກາໄດ້ລົງພິມບົດຄວາມໂດຍຂຽນວ່າ, ລັດຖະບານຈີນສ້າງນະໂຍບາຍເສດຖະກິດປະຈຳປີໃນໄລຍະເປີດກອງປະຊຸມສະພາປະຊາຊົນແຫ່ງຊາດໃນແຕ່ລະປີ. ເປົ້າໝາຍການເຕີບໂຕດ້ານເສດຖະກິດຂອງປີນີ້ແມ່ນຄືກັນກັບສອງປີທີ່ຜ່ານມາ, ທັງໝົດເຫຼົ່ານີ້ລ້ວນແຕ່ໄດ້ສົ່ງສັນຍານທີ່ສະແດງໃຫ້ເຫັນເຖິງຄວາມໝັ້ນຄົງແລະຄວາມຕໍ່ເນື່ອງຂອງນະໂຍບາຍເສດຖະກິດຈີນ.
ຂ່າວສານ AFP ຂອງຝະຣັ່ງໄດ້ໃຫ້ຄວາມເອົາໃຈໃສ່ຕໍ່ເນື້ອໃນຂອງບົດລາຍງານທີ່ກ່ຽວກັບງົບປະມານດ້ານການປ້ອງກັນປະເທດໄດ້ເພີ່ມຂຶ້ນ 12,2% ຖ້າທຽບໃສ່ໄລຍະດຽວກັນຂອງປີ 2013ຜ່ານມາ.
ທ່ານຮາຕັນ ນັກວິຈານຂອງບໍລິສັດ BBC ອັງກິດກ່າວວ່າ, ຄະນະນຳຊຸດໃໝ່ຂອງຈີນໄດ້ວາງແຜນແມ່ບົດກ່ຽວກັບການປະຕິຮູບດ້ານເສດຖະກິດ,ໂຄງປະກອບສັງຄົມແລະແຜນພັດທະນາຂອງຈີນ, ກອງປະຊຸມສະພາປະຊາຊົນແຫ່ງຊາດຈີນແລະກອງປະຊຸມສະພາປຶກສາການເມືອງປະຊາຊົນແຫ່ງຊາດຈີນປີ 2014 ນີ້ ຈະສືບຕໍ່ຊຸກຍູ້ການປະຕິຮູບເຫຼົ່ານີ້.