ຕາມຂ່າວCRI: ໜັງສືພິມ "ຢືນໝິນຢື້ປ້າວ" ຂອງຈີນລາຍງານວ່າ, ກອງປະຊຸມສະພາປະຊາຊົນແຫ່ງຊາດຈີນຄັ້ງທີ 2 ສະໄໝທີ 12 ແລະກອງປະຊຸມສະພາປຶກສາການເມືອງປະຊາຊົນແຫ່ງຊາດຈີນຄັ້ງທີ 2 ສະໄໝທີ 12 ກຳລັງຈັດຂຶ້ນຢູ່ນະຄອນຫຼວງປັກກິ່ງ, ປະຊາຄົມໂລກໄດ້ເອົາໃຈໃສ່ຢ່າງໃກ້ຊິດຕໍ່ກອງປະຊຸມສອງສະພາດັ່ງກ່າວຈະຊຸກຍູ້ການພັດທະນາດ້ານເສດຖະກິດຂອງຈີນແນວໃດ. ທ່ານຊຽນເຟີງ, ຮອງຫົວໜ້າສຳນັກງານໜັງສືພິມ "ອາຊີນິວທາມ" ຂອງໄທກ່າວວ່າ, ການເຕີບໂຕດ້ານເສດຖະກິດຂອງຈີນໄດ້ຊັກນຳການເຕີບໂຕດ້ານການສົ່ງອອກຂອງບັນດາປະເທດອາຊີຕາເວັນອອກສຽງໃຕ້, ປະເທດອາຊີຕາເວັນອອກສຽງໃຕ້ເບິ່ງໄປໃນແງ່ດີຕໍ່ເສດຖະກິດຈີນ.
ທ່ານຊຽນເຟີງກ່າວວ່າ, ເສດຖະກິດຈີນໄດ້ຮັກສາທ່ວງທ່າການພັດທະນາຢ່າງໝັ້ນທ່ຽງແລະປອດໃສ, ໂດຍໄດ້ຮັບປະກັນການປະກອບອາຊີບຂອງປະຊາຊົນຢ່າງເຕັມທີ, ສ່ວນທັງໄດ້ຄວບຄຸມໄພເງິນເຟີ້ຢ່າງມີປະສິດທິຜົນ.
ທ່ານຊຽນເຟີງກ່າວວ່າ, ການເຕີບໂຕດ້ານເສດຖະກິດຂອງຈີນໄດ້ຊຸກຍູ້ໃຫ້ການສົ່ງອອກຂອງປະເທດອາຊີຕາເວັນອອກສຽງໃຕ້ເພີ່ມຂຶ້ນ, ບັນດາປະເທດອາຊີຕາເວັນອອກສຽງໃຕ້ໄດ້ເບິ່ງໄປໃນແງ່ດີຕໍ່ເສດຖະກິດຈີນໂດຍທົ່ວໄປ. ວິສາຫະກິດຈີນທີ່ໄປລົງທຶນຢູ່ອາຊີຕາເວັນອອກສຽງໃຕ້ນັບມື້ນັບຫຼາຍຂຶ້ນ. ພ້ອມກັນນັ້ນ, ວິສາຫະກິດອາຊີຕາເວັນອອກສຽງໃຕ້ກໍ່ໄດ້ທະຍອຍກັນມາພັດທະນາກິດຈະການຢູ່ຈີນ, ເພື່ອກຳໂອກາດເອື້ອອຳນວຍຈາກການພັດທະນາຂອງຈີນ. ການພົວພັນດ້ານເສດຖະກິດການຄ້າລະຫວ່າງຈີນກັບບັນດາປະເທດອາຊີຕາເວັນອອກສຽງໃຕ້ນັບມື້ນັບແໜ້ນແຟ້ນຍິ່ງຂຶ້ນ, ແມ່ນປະຊາຄົມໂຊກຊະຕາທີ່ແທ້ຈິງ.