ວັນທີ 6 ມີນານີ້ຢູ່ນະຄອນຫຼວງປັກກິ່ງຂອງຈີນ,ທ່ານໂລຫົງຈ່ຽງ ຮອງເລຂາຄະນະພັກ, ເຈົ້າຄອງກິ່ງແຂວງປົກຄອງຕົນເອງເຜົ່າລື້ສິບສອງພັ່ນນາແຂວງຢຸນນານ ເຊິ່ງເປັນຜູ້ແທນປະຊາຊົນແຂວງຢຸນນານທີ່ເຂົ້າຮ່ວມກອງປະຊຸມເທື່ອທີ 2 ຂອງສະພາປະຊາຊົນແຫ່ງຊາດຈີນຊຸດທີ 12 ໄດ້ກ່າວວ່າ, ປີ 2014 ນີ້, ກິ່ງແຂວງສິບສອງພັ່ນນາຈະເພີ່ມທະວີໃນການສ້າງເວທີໃຫ້ສິບສອງພັ່ນນາສາມາດເຊື່ອມຈອດກັນກັບປະເທດອ້ອມຂ້າງຢູ່ອາຊີຕາເວັນອອກສຽງໃຕ້.
ທ່ານໂລຫົງຈ່ຽງກ່າວວ່າ, ການເຊື່ອມຈອດກັນບໍ່ພຽງແຕ່ສ່ອງແສງໃຫ້ເຫັນຢູ່ໃນການກໍ່ສ້າງ ພື້ນຖານໂຄງລ່າງເທົ່ານັ້ນ, ໃນອະນາຄົດ,ຍັງຈະເພີ່ມທະວີການແລກປ່ຽນແລະຮ່ວມມືກັນກັບປະເທດອາຊີຕາເວັນອອກສຽງໃຕ້ໃນດ້ານວັດທະນະທຳ, ການສຶກສາແລະເສດຖະກິດການຄ້າເປັນຕົ້ນ. ທ່ານໂລຫົງຈ່ຽງມີຂໍ້ສະເໜີໃຫ້ລັດຖະບານຈົ່ງເລັ່ງລັດແກ້ໄຂບັນຫາຕ່າງໆທີ່ເປັນອຸປະສັກເປັນຕົ້ນແມ່ນເປີດປະຕູດ່ານຊາຍແດນຕໍ່ພາຍນອກຢ່າງມີເປົ້າໝາຍ, ບຸກຄົນປະເທດທີສາມສາມາດຖືໜັງສືຜ່ານແດນຫຼືປັສປໍຜ່ານດ່ານໄດ້ຢ່າງເສລີແລະອື່ນໆ, ຊຶ່ງຈະເພີ່ມໂອກາດການຮ່ວມມືດ້ານເສດຖະກິດການຄ້າລະຫວ່າງຈີນກັບປະເທດຕ່າງໆໃນອາຊີຕາເວັນອອກແລະອາຊີໃຕ້ໃຫ້ໄດ້ດີຍິ່ງຂຶ້ນ.
 |
