ຫວ່າງມໍ່ໆມານີ້ ກອງປະຊຸມສອງສະພາຂອງຈີນໄດ້ຈັດກອງປະຊຸມຂ່າວຢູ່ທີ່ປັກກິ່ງ, ທ່ານກ່າວຫູເຊິງ ລັດຖະມົນຕີວ່າການກະຊວງການຄ້າຈີນໄດ້ຕອບຄຳຖາມຂອງນັກຂ່າວກ່ຽວກັບ "ການຂະຫຍາຍການຄ້າກັບການເປີດປະຕູສູ່ພາຍນອກ". ທ່ານກ່າວຫູເຊິງກ່າວວ່າ, ຈີນມີຄວາມໝັ້ນໃຈທີ່ຈະບັນລຸເປົ້າໝາຍໃນດ້ານຈັງຫວະເຕີບໂຕດ້ານການຄ້າກັບພາຍນອກຂອງປີນີ້ຄື: 7,5%.
ໃນປີ 2013 ການຄ້າສິນຄ້າຂອງຈີນໄດ້ບັນລຸລວມຍອດຂາເຂົ້າຂາອອກໃນມູນຄ່າ 4160 ຕື້ໂດລາ, ໄດ້ກາຍເປັນປະເທດໃຫຍ່ອັບດັບໜຶ່ງໃນດ້ານການຄ້າສິນຄ້າຂອງໂລກ ເຊິ່ງໄດ້ລື່ນກາຍສະຫະລັດອາເມລິກາ. ຈີນໄດ້ກາຍເປັນປະເທດພວມພັດທະນາພຽງປະເທດດຽວທີ່ເຂົ້າສູ່ຖັນແຖວປະເທດໃຫຍ່ໃນດ້ານການຄ້າສິນຄ້າຂອງໂລກໃນຮອບ 100 ກວ່າປີມານີ້. ເມື່ອກ່າວເຖິງສະພາບການຄ້າກັບພາຍນອກຂອງຈີນໃນປີນີ້, ທ່ານກ່າວຫູເຊິງ ລັດຖະມົນຕີວ່າການກະຊວງການຄ້າຈີນກ່າວວ່າ ມີຄວາມໝັ້ນໃຈຢ່າງເຕັມປ່ຽມຕໍ່ການບັນລຸຈັງຫວະເຕີບໂຕຄື 7,5%.
ເມື່ອເວົ້າເຖິງບັນຫາຂັດແຍ້ງກັນໃນດ້ານການຄ້າ, ທ່ານກ່າວຫູເຊິງກ່າວວ່າ, ຄຽງຄູ່ກັບຂະໜາດຂອງການຄ້າກັບພາຍນອກນັບມື້ນັບເປີດກວ້າງອອກ, ຄວາມຂັດແຍ້ງກັນດ້ານການຄ້າກໍໄດ້ເພີ່ມຂຶ້ນເຊັ່ນດຽວກັນ, ຈີນໄດ້ກາຍເປັນປະເທດໃຫຍ່ອັນດັບໜຶ່ງໃນດ້ານການຄ້າສິນຄ້າຂອງໂລກແລ້ວ, ຕ້ອງມີຄວາມທຸ່ນທ່ຽງຕໍ່ຄວາມຂັດແຍ້ງກັນເຫຼົ່ານີ້.