ວັນທີ 13 ມີນານີ້ ຢູ່ທີ່ປັກກິ່ງ ທ່ານຫຼີເຄີ້ສຽງ ນາຍົກລັດຖະມົນຕີຈີນກ່າວວ່າ: "ຂໍແຕ່ວ່າມີຄວາມຫວັງພຽງເລັກໜ້ອຍ, ພວກຂ້າພະເຈົ້າຈະບໍ່ປະຖິ້ມການຄົ້ນຫາຢ່າງເດັດຂາດ."
ທ່ານຫຼີເຄີ້ສຽງໄດ້ກ່າວຄຳເວົ້າດັ່ງກ່າວໃນເວລາຕອບຄຳຖາມກ່ຽວກັບບັນຫາເຮືອບິນມາເລເຊຍທີ່ຫາຍສາບສູນໄປໃນການພົບປະກັບນັກຂ່າວຈີນແລະຕ່າງປະເທດທີ່ຈັດຂຶ້ນພາຍຫຼັງກອງປະຊຸມຜູ້ແທນສະພາປະຊາຊົນແຫ່ງຊາດຈີນຄັ້ງທີ 2 ສະໄໝທີ 12 ສິ້ນສຸດລົງ.
ທ່ານຫຼີເຄີ້ສຽງກ່າວວ່າ, ປັດຈຸບັນ ລັດຖະບານຈີນໄດ້ເລີ່ມປະຕິບັດກົນໄກຮັບມືສຸກເສີນແລະຄົ້ນຫາຊ່ອຍເຫຼືອຢ່າງຮອບດ້ານ, ປັດຈຸບັນໄດ້ມີກຳປັ່ນຂອງຈີນ 8 ລຳເດີນທາງໄປຮອດເຂດທະເລທີ່ກ່ຽວຂ້ອງ, ຍັງມີອີກລຳໜຶ່ງກຳລັງເດີນທາງໄປຢູ່; ພ້ອມກັນນັ້ນ ພວກຂ້າພະເຈົ້າຍັງໄດ້ນຳໃຊ້ດາວທຽມ 10 ດວງເພື່ອໃຫ້ການສະໜັບສະໜູບທາງດ້ານເຕັກນິກຂໍ້ມູນຂ່າວສານ, ຈະບໍ່ປ່ອຍປະບ່ອນທີ່ໜ້າສົງໄສໃດໆ.
ທ່ານຫຼີເຄີ້ສຽງກ່າວວ່າ, ມື້ວານນີ້ ຂ້າພະເຈົ້າຍັງໄດ້ລົມກັບຜູ້ບັນຊາເຮືອຄົ້ນຫາຂອງຈີນລຳໜຶ່ງໂດຍຜ່ານທາງໂທລະສັບ, ເພື່ອຂໍໃຫ້ລາວທຳຄວາມພະຍາຍາມຂຶ້ນຕື່ມອີກ. ທ່ານຫຼີເຄີ້ສຽງກ່າວເນັ້ນວ່າ, "ຂໍແຕ່ວ່າມີຄວາມຫວັງພຽງເລັກໜ້ອຍ, ພວກຂ້າພະເຈົ້າຈະບໍ່ປະຖິ້ມການຄົ້ນຫາຢ່າງເດັດຂາດ." "ກ່ຽວກັບວຽກງານຄວາມປອດໄພຂອງຖ້ຽວບິນຈີນ, ພວກຂ້າພະເຈົ້າບໍ່ເຄີຍປະໝາດຈັກເທື່ອ, ເພາະມັນກ່ຽວພັນເຖິງຊີວິດຂອງຄົນ."
 |
