ຕາມຂ່າວ CRI: ວັນທີ 16 ມີນານີ້, ທີ່ເດີ່ນພະທາດຫຼວງ ນະຄອນຫຼວງວຽງຈັນ, ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວນະຄອນຫຼວງ, ໄດ້ຈັດງານປະກວດນາງສັງຂານນະຄອນຫຼວງວຽງຈັນ ປະຈຳ ພສ 2557 ຂື້ນ, ທ່ານ ສາຍທອງ ແກ້ວດວງດີ, ຮອງເຈົ້າຄອງນະຄອນຫຼວງວຽງຈັນ, ທ່ານ ນາງ ວັນເພັງ ແກ້ວນະຄອນ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວນະຄອນຫຼວງ, ຄະນະ ກຳມະການ, ພ້ອມດ້ວຍມວນຊົນຊາວນະຄອນຫຼວງວຽງຈັນເຂົ້າຮ່ວມຢ່າງຄຶກຄື້ນ.
ບັນດານ້ອງນາງສາວທີ່ເຂົ້າຮ່ວມປະກວດນາງສັງຂານປີນີ້, ມີ 22 ນ້ອງນາງສາວທີ່ມາຈາກ 9 ເມືອງ. ຈາກນັ້ນ, ໄດ້ຄັດເຫຼືອພຽງແຕ່ 11 ນ້ອງນາງສາວ ເພື່ອເຂົ້າໄປສູ່ຮອບ 7 ຄົນສຸດທ້າຍ. ຜ່ານການຕອບຄຳຖາມທີ່ມີໄຫວພິບ ສາມາດຊະນະໃຈຄະນະກຳມະການ ແລະ ກອງເຊຍ ໄດ້ນັ້ນ, M3 ນາງ ມະນີລາ ຫຼວງບັນດິດ ຄອງນາງສັງຂານນະຄອນຫຼວງວຽງຈັນ ປະຈຳປີ ພສ 2557 ແລະ ນາງສາວມິດຕະພາບ, ພ້ອມດ້ວຍມົງກຸດ, ສາຍສະພາຍ, ແລະ ເງິນສົດລວມມູນຄ່າ 40 ລ້ານກວ່າກີບ, ຮອງອັນດັບໜື່ງ M5 ນາງ ພອນທິບ ບົວລະວົງ, ຮອງອັນດັບສອງ M16 ນາງ ລີນ້າ ວິນນະສານ, ສ່ວນຮອງອັນດັບສາມ M1 ນາງ ມຸກດາວັນ ໄພມະນີວົງ, M2 ນາງ ສຸກສາຄອນ ປັນຍາບັນດິດ, M18 ນາງ ປາດຖະໜາ ສຸກກະສັນ ແລະ M20 ນາງ ວັນດາໄລທູນສະຫວັດ.
ສຳລັບທັງ 7 ນ້ອງນາງສາວ ຈະໄດ້ເຂົ້າຮ່ວມແຫ່ຂະບວນນາງສັງຂານປະຈຳປີ ພສ 2557 ທີ່ວັດອິນແປງ ໃນວັນທີ 14 ເມສາທີ່ຈະມາເຖິງນີ້.
