ຈີນຫວັງຢາກໃຫ້ຜູ້ເຂົ້າຮ່ວມກອງປະຊຸມເວທີປຶກສາຫາລືອາຊີໂປອາວຈົ່ງມີຄວາມເຫັນທີ່ເປັນເອກະສັນກັນ ແລະຮ່ວມກັນສ້າງອະນາຄົດໃໝ່ຂອງອາຊີ

ວັນທີ 2 ເມສານີ້, ຢູ່ທີ່ປັກກິ່ງ, ທ່ານຫົງເຫຼີຍ, ໂຄສົກກະຊວງການຕ່າງປະເທດຈີນກ່າວວ່າ, ຈີນຫວັງຢາກໃຫ້ຜູ້ເຂົ້າຮ່ວມກອງປະຊຸມເວທີປຶກສາຫາລືອາຊີໂປອາວປະຈຳປີ 2014 ຈົ່ງມີຄວາມເຫັນທີ່ເປັນເອກະສັນກັນໂດຍປິ່ນອ້ອມຫົວຂໍ້ຂອງກອງປະຊຸມ, ປົກປັກຮັກສາຄວາມໝັ້ນຄົງ ແລະທ່າອ່ຽງການເຕີບໂຕໃນການພັດທະນາເສດຖະກິດຂອງອາຊີແລະອົງກອນເສດຖະກິດທີ່ຈະເລີນໃໝ່.

ທ່ານຫົງເຫຼີຍກ່າວວ່າ, ກອງປະຊຸມເວທີປຶກສາຫາລືອາຊີໂປອາວປະຈຳປີ 2014 ຈະຈັດຂຶ້ນຢູ່ໂປອາວຂອງແຂວງໄຫຫຼຳຈີນໃນວັນທີ 8 ຫາວັນທີ 11 ເມສານີ້, ແລະຈະຈັດພິທີໄຂກອງປະຊຸມໃນຕອນເຊົ້າວັນທີ 10 ເມສານີ້. ກອງປະຊຸມຈະດຳເນີນການປຶກສາຫາລືຢ່າງເລິກເຊິ່ງກ່ຽວກັບຫົວຂໍ້ຕ່າງໆເຊັ່ນ: ສະຖານະການດ້ານເສດຖະກິດ-ການເງິນສາກົນໃນປະຈຸບັນ, ການຮ່ວມມືດ້ານການເງິນອາຊີ, ການເຊື່ອມຈອດກັນດ້ານພື້ນຖານໂຄງລ່າງ, ການຄ້າເສລີຢູ່ພາກພື້ນແລະລະບົບການຄ້າຫຼາຍຝ່າຍເປັນຕົ້ນໂດຍປິ່ນອ້ອມຫົວຂໍ້ຫັຼກ "ອະນາຄົດໃໝ່ຂອງອາຊີ ສະແຫວງຫາແລະປ່ອຍພະລັງແຮງໃໝ່ດ້ານການພັດທະນາ", ຖືການປະຕິຮູບ, ການປະດິດສ້າງໃໝ່ແລະການພັດທະນາແບບຍືນຍົງເປັນທິດທາງຕົ້ນຕໍ.