ກອງປະຊຸມເວທີປຶກສາຫາລືອາຊີໂປອາວຈະຈັດຂຶ້ນຢູ່ແຂວງໄຫຫຼຳຂອງຈີນໃນວັນທີ 8 ຫາວັນທີ 11 ເມສານີ້, ຫົວຂໍ້ຫຼັກຂອງກອງປະຊຸມໃນປີນີ້ແມ່ນ "ອະນາຄົດໃໝ່ຂອງອາຊີ ສະແຫວງຫາແລະປ່ອຍແມ່ແຮງໃໝ່ໃນການຊຸກຍູ້ການພັດທະນາ". ທ່ານປີເຕີ ມານເດວຊັນ ປະທານບໍລິສັດໃຫ້ຄຳປຶກສາຍຸດທະສາດສາກົນອັງກິດທີ່ຈະເຂົ້າຮ່ວມກອງປະຊຸມເວທີປຶກສາຫາລືອາຊີໂປອາວກ່າວໃນເວລາໃຫ້ສຳພາດຕໍ່ນັກຂ່າວວ່າ, ທ່ານໄດ້ເບິ່ງໄປໃນແງ່ດີຕໍ່ທ່າແຮງບົ່ມຊ້ອນແລະອະນາຄົດຂອງການເຕີບໂຕຂອງຕະຫຼາດອາຊີ.
ທ່ານປີເຕີ ມານເດວຊັນກ່າວວ່າ, ເຖິງວ່າເສດຖະກິດໂລກໃນປະຈຸບັນຢູ່ໃນຂະບວນການຟື້ນຕົວຂຶ້ນກໍ່ຕາມ, ແຕ່ມີການຟື້ນຕົວຊ້າຫຼາຍ. ອີງຕາມຕົວເລກຂໍ້ມູນຂອງອົງການກອງທຶນການເງິນສາກົນຫຼື IMF ສະແດງໃຫ້ເຫັນວ່າ, ຕະຫຼາດທີ່ພັດທະນາໃໝ່ຂອງອາຊີຍັງຈະແມ່ນກຳລັງສຳຄັນໃນການຊຸກຍູ້ການເຕີບໂຕຂອງເສດຖະກິດໂລກ, ຄາດວ່າປີ 2014, ຄວາມໄວການເຕີບໂຕຂອງເສດຖະກິດຈະສ້າງສະຖິຕິສູງສຸດຂອງໂລກ, ຫຼາຍກວ່າ 6,5%.
ເມື່ອກ່າວເຖິງການປະຕິຮູບຂອງເສດຖະກິດຈີນແລະຜົນສະທ້ອນທີ່ມີຕໍ່ເສດຖະກິດຂອງອາຊີ, ທ່ານປີເຕີ ມານເດວຊັນກ່າວວ່າ, ຮູບແບບການເຕີບໂຕຂອງເສດຖະກິດຈີນທີ່ຖືການສົ່ງອອກເປັນແກນນຳຕ້ອງການມີການປ່ຽນແປງ, ແຕ່ນີ້ຈະສ້າງໂອກາດຫຼາຍກວ່າເກົ່າໃຫ້ແກ່ການສ້າງຕ່ອງໂສ້ຜະລິດຕະກຳຂອງອາຊີຄືນໃໝ່. ສ່ວນກຸ່ມຜູ້ບໍລິໂພກຂອງຈີນກໍ່ບໍ່ພຽງແຕ່ຊື່ສິນຄ້າທີ່ຈີນຜະລິດເທົ່ານັ້ນ, ແຕ່ຍັງຈະໄປບໍລິໂພກຢູ່ຕ່າງປະເທດອີກດ້ວຍ, ສະນັ້ນ, ຈີນຈະແມ່ນຕະຫຼາດສິນຄ້າແລະການບໍລິການທີ່ສຳຄັນຂອງປະເທດອື່ນໆໃນອາຊີ. ນອກນີ້, ການໄຂປະຕູແລະການຫັນເປັນແບບສາກົນຂອງຕະຫຼາດການເງິນຂອງຈີນ, ຈະເຮັດໃຫ້ການຄ້າຢູ່ໃນພາກພື້ນແຫ່ງນີ້ມີຄວາມສະດວກຂຶ້ນຕື່ມ, ຊຸກຍູ້ການເຕີບໂຕດ້ານການໝູນວຽນຂອງທຶນຮອນການລົງທຶນ.
 |
