ເວທີປຶກສາຫາລືອາຊີໂປອາວປະຈຳປີ 2014 ໄດ້ເລີ່ມຕົ້ນຂຶ້ນຢູ່ເມືອງໂປອາວ ແຂວງໄຫຫຼຳຈີນໃນຕອນເຊົ້າວັນທີ 10 ເມສານີ້. ທ່ານສູນທອນ ຄັນທະວົງ, ຜູ້ອຳນວຍການໃຫຍ່ສຳນັກຂ່າວສານປະເທດລາວ ທີ່ເຂົ້າຮ່ວມກອງປະຊຸມຄັ້ງນີ້ ໄດ້ໃຫ້ສຳພາດຕໍ່ນັກຂ່າວວິທະຍຸສາກົນແຫ່ງປະເທດຈີນ ຫຼື CRI ກ່ຽວກັບຄຳປາຖະກະຖາຂອງທ່ານ ຫຼີເຄີ້ງສຽງ, ນາຍົກລັດຖະມົນຕີຈີນ ທີ່ກ່າວໃນພິທີໄຂກອງປະຊຸມເວທີປຶກສາຫາລືອາຊີໂປອາວໃນຄັ້ງນີ້, ໂດຍກ່າວວ່າ:
"ຄຳປາຖະກະຖາຂອງທ່ານນາຍົກລັດຖະມົນຕີ ຫຼີເຄີ້ສຽງ ທີ່ກ່າວໃນກອງປະຊຸມປະຈຳປີ 2014 ຄັ້ງນີ້ ໄດ້ສະເໜີຍຸດທະສາດທີ່ສຳຄັນກ່ຽວກັບການພັດທະນາຮ່ວມກັນຂອງບັນດາປະເທດອາຊີ, ມີຜົນດີຫຼາຍຕໍ່ການຊຸກຍູ້ຄວາມກ້າວໜ້າຮ່ວມຂອງບັນດາປະເທດອາຊີ, ສະນັ້ນຈຶ່ງມີຄວາມສຳຄັນຫຼາຍ. ທ່ານສະເໜີວ່າ ບັນດາປະເທດອາຊີຄວນພະຍາຍາມຮ່ວມກັນເພື່ອສ້າງສະພາບແວດລ້ອມອັນດີງາມ, ເຊິ່ງຈຸດນີ້ມີຄວາມໝາຍສຳຄັນຍິ່ງ. ຖ້າວ່າພວກເຮົາບໍ່ສາມາດແກ້ໄຂບັນຫາສະພາບແວດລ້ອມການພັດທະນາໄດ້, ກໍບໍ່ອາດສາມາດແລກປ່ຽນກັນໄດ້, ເຂົ້າໃຈເຊິ່ງກັນແລະກັນໄດ້ ແລະຮ່ວມກັນກ້າວເດີນໄປໜ້າໄດ້. ສະນັ້ນ, ການຮ່ວມກັນສ້າງສະພາບແວດລ້ອມອັນດີງາມ, ແກ້ໄຂບັນຫາທີ່ເຮັດແນວໃດຈຶ່ງສາມາດບັນລຸການຢູ່ຮ່ວມກັນໂດຍສັນຕິ ແລະ ລົບລ້າງຄວາມເຫັນທີ່ຂັດແຍ້ງກັນ, ອຳນວຍຄວາມສະດວກເຊິ່ງກັນແລະກັນດ້ານບຸກຄະລາກອນ ແລະ ເຕັກນິກ, ພວກເຮົາຈຶ່ງຈະສາມາດພັດທະນາຮ່ວມກັນໄດ້."
