ທ່ານຫຼີເຄີ້ສຽງ, ນາຍົກລັດຖະມົນຕີຈີນໄດ້ກ່າວປາຖະກະຖາໃນເວທີປຶກສາຫາລືອາຊີໂປອາວປະຈຳປີ 2014 ໃນວັນທີ 10 ເມສານີ້, ເຊິ່ງເຮັດໃຫ້ພາຍໃນແລະຕ່າງປະເທດມີຄວາມສົນໃຈຫຼາຍ. ນັກເສດຖະສາດ ເຫັນວ່າ, ຄຳປາຖະກະຖາຂອງທ່ານ ຫຼີເຄີ້ສຽງ ໄດ້ສະແດງໃຫ້ເຫັນເຖິງແນວຄວາມຄິດໃໝ່ຂອງລັດຖະບານຈີນ.
ທ່ານເສີນເຟິ້ງຢິ່ງ, ຫົວໜ້າສະຖາບັນຄົ້ນຄວ້າເສດຖະກິດໂລກ ສະຖາບັນຄົ້ນຄວ້າການພົວພັນສາກົນຍຸກປັດຈຸບັນຈີນ ກ່າວວ່າ: ໃນປາຖະກະຖາ, ທ່ານຫຼີເຄີ້ສຽງ ໄດ້ກ່າວວ່າ ຄວນໃຫ້ບູລິມະສິດຕໍ່ການຮ່ວມມືໃນອາຊີ, ຄວາມຈິງແລ້ວ ເຂດການຄ້າເສລີອາຊີປາຊີຟິກກໍໄດ້ກວມເຖິງບັນດາສະມາຊິກຂອງສັນຍາຄູ່ຮ່ວມມືຂ້າມມະຫາສະໝຸດປາຊີຟິກ ຫຼື TPP ແລະ 21 ສະມາຊິກຂອງພາກພື້ນອາຊີປາຊີຟິກທັງໝົດແລ້ວ, ນີ້ເປັນຄຳສະເໜີໃໝ່ແລະກໍເປັນການປະດິດສ້າງເຊັ່ນກັນ.
ທ່ານຫວາງຈິ່ນ, ຮອງຫົວໜ້າພະແນກຄົ້ນຄວ້າແລະທີ່ປຶກສາ ສູນແລກປ່ຽນດ້ານເສດຖະກິດສາກົນຈີນ ກ່າວວ່າ: ຄຳປາຖະກະຖາຂອງທ່ານ ຫຼີເຄີ້ສຽງ ກ່ຽວກັບການພັດທະນາເສດຖະກິດຂອງຈີນ ໄດ້ຊີ້ແຈງທັດສະນະຄະຕິດ້ານການປົກຄອງຂອງລັດຖະບານຈີນຢ່າງຈະແຈ້ງ, ໃນຂະນະທີ່ໃຫ້ຄວາມສຳຄັນຕໍ່ຄວາມກໍ້າກິ່ງກັນດ້ານປະລິມານຂອງເສດຖະກິດນັ້ນ, ໄດ້ໃຫ້ຄວາມສຳຄັນຕໍ່ຄຸນນະພາບຂອງການພັດທະນາເສດຖະກິດ ແລະ ການພັດທະນາຢ່າງປອດໃສໃນໄລຍະກາງແລະໄລຍະຍາວ ຫຼາຍຍິ່ງຂຶ້ນ.
