ໃນ 5 ປີຕໍ່ໜ້ານີ້ ເສດຖະກິດຈີນຍັງມີຄວາມຫວັງທີ່ຈະເພີ່ມຂຶ້ນໃນຈັງຫວະ 7% ຮອດ 8%

    ຕາມຂ່າວສານຊິນຮວາ: ວັນທີ 9 ເມສານີ້ ໃນເວທີປຶກສາຫາລືໃນຫົວຂໍ້ "ເບິ່ງເສດຖະກິດອາຊີ 2014: ສົນທະນາກັບກຳມະການຂອງເວທີປຶກສາຫາລືອາຊີໂປອາວ" ຂອງເວທີປຶກສາຫາລືອາຊີໂປອາວ, ທ່ານເຈິ່ງເພີຍຢຽນ ຮອງປະທານຄະນະກຳມະການເວທີປຶກສາຫາລືອາຊີໂປອາວ ຫົວໜ້າຜູ້ຕາງໜ້າຝ່າຍຈີນ ໄດ້ສະແດງຄວາມຄິດຄວາມເຫັນກ່ຽວກັບເສດຖະກິດໂລກແລະສະຖານະການເສດຖະກິດຂອງຈີນໃນປັດຈຸບັນ.

    ທ່ານເຈີ່ງເພີຍຢຽນກ່າວວ່າ, ເມື່ອໄດ້ພັດທະນາດ້ວຍຄວາມໄວສູງເປັນເວລາ 30 ກວ່າປີແລ້ວ, ເສດຖະກິດຈີນໄດ້ເຂົ້າສູ່ໄລຍະທີ່ປ່ຽນຈັງຫວະ, ໜ້າທີ່ຕົ້ນຕໍໃນຂົງເຂດເສດຖະກິດແມ່ນປ່ຽນແປງຮູບການພັດທະນາ, ຍົກສູງລະດັບແລະປັບປຸງອົງປະກອບໃຫ້ດີຂຶ້ນ, ປັດຈຸບັນ, ເສດຖະກິດຂອງຈີນຍັງຄົງຮັກສາຄວາມມີຊີວິດຊີວາຢູ່ຄືເກົ່າ, ສະນັ້ນ ໃນ 5 ປີຕໍ່ໜ້ານີ້ ຍັງມີຄວາມຫວັງທີ່ຈະບັນລຸຈັງຫວະເຕີບໂຕແຕ່ 7% ຫາ 8%.

    ທ່ານເຈີ່ງເພີຍຢຽນກ່າວວ່າ, ໃນໜຶ່ງປີທີ່ຜ່ານມາ, ເສດຖະກິດໂລກໄດ້ເກີດມີການປ່ຽນແປງໃໝ່ຈຳນວນໜຶ່ງ. ອົງກອນເສດຖະກິດທີ່ພັດທະນາແລ້ວໄດ້ຟື້ນຟູໃຫ້ດີຂຶ້ນໃນລະດັບທີ່ຕ່າງກັນ, ໃນນັ້ນ ເສດຖະກິດຂອງອາເມລິກາໄດ້ມີວີແວວພົ້ນເດັ່ນກວ່າໝູ່ທີ່ເສດຖະກິດຟື້ນຟູການພັດທະນາ; ສ່ວນຈັງຫວະເຕີບໂຕທາງເສດຖະກິດຂອງອົງກອນທີ່ຈະເລີນໃໝ່ໄດ້ຊ້າລົງໂດຍລວມ. ສະນັ້ນ ເບິ່ງລວມແລ້ວເຫັນວ່າ ເສດຖະກິດຂອງໂລກໄດ້ມີສະຖານະການທີ່ມີການເຕີບໂຕຢ່າງດຸນດ່ຽງກັນໂດຍທຽບຖານ.