ສອງຝ່າຍທີ່ມີຄວາມຂັດແຍ້ງກັນທາງການເມືອງຂອງໄທຍຸດຕິການເປັນປໍລະປັກກັນເປັນການຊົ່ວຄາວເພື່ອສະເຫີຼມສະຫຼອງບຸນສົງການ

ຕາມຂ່າວສານຈີນ: ເພື່ອສະເຫຼີມສະຫຼອງບຸນສົງການຊຶ່ງເປັນບຸນປີໃໝ່ຕາມພຸດທະສັງກາດ, ສອງຝ່າຍທີ່ມີຄວາມຂັດແຍ້ງກັນທາງການເມືອງຂອງໄທໄດ້ຍຸດຕິການເປັນປໍລະປັກກັນທາງການເມືອງທີ່ໄດ້ດຳເນີນຢ່າງຕໍ່ເນື່ອງມາເປັນເວລາເກືອບເຄິ່ງປີແລ້ວ.

ວັນທີ 13 ເມສານີ້, ທ່ານນາງຍິ່ງລັກ ຊິນນະວັດ, ນາຍົກລັດຖະມົນຕີໄທໄດ້ສະຫຼອງບຸນສົງການບຸນປີໃໝ່ໄທຢູ່ຈັງຫວັດຊຽງໃໝ່, ນາງກ່າວຫຼັງພິທີຖວາຍສັງຄະທານວ່າ, ຫວັງຢາກໃຫ້ທົ່ວປວງຊົນຂອງໄທຮ່ວມກັນຜ່ານຜ່າຄວາມຫຍຸ້ງຍາກທຸກປະການ, ເພື່ອຕ້ອນຮັບອະນາຄົດທີ່ດີງາມທີ່ປະເທດຊາດແລະປະຊາຊົນຮ່ວມກັນຄອງຄອຍຢູ່.

ວັນທີ 13 ເມສານີ້, ທ່ານສຸເທບ ເທືອກສຸບັນ, ແກນນຳ "ຄະນະກຳມະການປະຊາຊົນປະຕິຮູບປະຊາທິປະໄຕ"ຊຶ່ງເປັນກຸ່ມຕໍ່ຕ້ານລັດຖະບານຂອງໄທໄດ້ຮ່ວມກັບຜູ້ສະໜັບສະໜູນສະຫຼອງບຸນປີໃໝ່ໄທຢູ່ສະຖານທີ່ໂຮມຊຸມນຸມໃນສວນສາທາລະນະລຸມພີນີນະຄອນຫຼວງບາງກອກ. ກ່ອນໜ້ານີ້ ກຸ່ມນີ້ໄດ້ຕົກລົງວ່າ, ໃນໄລຍະບຸນປີໃໝ່ໄທຄືແຕ່ວັນທີ 12 ຫາວັນທີ 15 ເມສານີ້, ຈະບໍ່ຈັດການເຄື່ອນໄຫວປະທ້ວງຕໍ່ຕ້ານລັດຖະບານແຕ່ຢ່າງໃດ, ເພື່ອໃຫ້ປະຊາຊົນໄທສາມາດຫຼິ້ນບຸນປີໃໝ່ທີ່ມີຄວາມສະຫງົບ.