ວັນທີ 14, 15, 16 ເມສາແມ່ນວັນບຸນປີໃໝ່ຂອງປະເທດອາຊີຕາເວັນອອກສຽງໃຕ້. ໃນວັນທີ 13 ເມສານີ້, ນັກສຶກສາຫຼາຍພັນຄົນທີ່ມາຈາກຈີນ, ຫວຽດນາມ, ລາວ, ມຽນມາ, ອິນໂດເນເຊຍ, ກໍາປູເຈຍແລະ ສ.ເກົາຫຼີໄດ້ເຕົ້າໂຮມກັນຢູ່ມະຫາວິທະຍາໄລກວາງຊີໂດຍໃສ່ເຄື່ອງນຸ່ງທີ່ມີເອກະລັກຂອງປະເທດຕົນ ເພື່ອສະຫຼອງບຸນປີໃໝ່. ເຈົ້າໜ້າທີ່ຂອງສະຖານກົງສຸນຂອງຫຼາຍປະເທດອາຊຽນປະຈໍານະຄອນໜານໜິງກໍໄດ້ເຂົ້າຮ່ວມກິດຈະກໍາດັ່ງກ່າວ.
ນັກສຶກສາຂອງປະເທດຕ່າງໆຍັງໄດ້ຈັດການສະແດງວັດທະນະທໍາຢູ່ໂຮງຮຽນເພື່ອແນະນໍາວັດທະນະທໍາ, ຮີດຄອງປະເພນີແລະເຄື່ອງຫັດຖະກໍາຂອງປະເທດຕົນ. ເຂົ້າໜົມອົມຂອງຫວຽດນາມ, ໝາກໝັ້ນດໍາຂອງມຽນມາ, ຕົ້ມຍໍາຂອງໄທ, ກາເຟຂອງລາວແລະອາຫານຊະນິດຕ່າງໆທີ່ກະກຽມໂດຍນັກສຶກສາອາຊຽນ ໄດ້ດຶງດູດຄົນທັງຫຼາຍໄປຊີມ. ນັກສຶກສາຂອງຈີນໄດ້ສະແດງສິລະປະການຕັດເຈ້ຍ, ວິທີຂຽນງາມ, ການຫຼິ້ນພິນບູຮານຈີນ, ແບບແຕ່ງໜ້າຂອງຕົວລະຄອນງິ້ວປັກກິ່ງ, ການທັກເຊືອກຈີນ ເຊິ່ງໄດ້ດຶງດູດນັກສຶກສາອາຊຽນເຂົ້າຮ່ວມຢ່າງຫຼວງຫຼາຍ.
ທ່ານຢາງເຫວີຍເຈ່ຍ, ຮອງຫົວໜ້າພະແນກສຶກສາທິການເຂດກວາງຊີຂອງຈີນກ່າວວ່າ, ໃນຖານະທີ່ເປັນດ່ານໜ້າໃນການແລກປ່ຽນແລະການຮ່ວມມືລະຫວ່າງຈີນກັບອາຊຽນ, ເຂດກວາງຊີໄດ້ກາຍເປັນໜຶ່ງໃນແຂວງຫຼືເຂດທີ່ດຶງດູດນັກສຶກສາປະເທດອາຊຽນມາຮຽນຕໍ່ຫຼາຍທີ່ສຸດຢູ່ຈີນ. ໃນປີ 2013, ລວມມີນັກສຶກສາຂອງປະເທດອາຊຽນຈໍານວນ 8332 ຄົນມາຮຽນຢູ່ເຂດກວາງຊີ. ປີນີ້ແມ່ນປີແລກປ່ຽນວັດທະນະທໍາຈີນ-ອາຊຽນ, ເຂດກວາງຊີຈະສ້າງການພົວພັນດ້ານເສດຖະກິດການຄ້າແລະວັດທະນະທໍາທີ່ແໜ້ນແຟ້ນກວ່າເກົ່າກັບບັນດາປະເທດອາຊຽນ, ຊຸກຍູ້ການຮ່ວມມືສອງຝ່າຍໃນຂົງເຂດການສຶກສາ, ວັດທະນະທໍາແລະອື່ນໆ.
