ຕາມຂ່າວCRI: ງານຕະຫຼາດນັດການຄ້າແລະການທ່ອງທ່ຽວເຂດຊາຍແດນສິບສອງພັ່ນນາຄັ້ງທີ 17 ໄດ້ຈັດຂຶ້ນຢູ່ນະຄອນຊຽງຮຸ່ງເທດສະບານກິ່ງແຂວງປົກຄອງຕົນເອງເຜົ່າໄທລື້ສິບສອງພັ່ນນາຂອງແຂວງຢຸນນານຈີນໃນວັນທີ 13 ເມສານີ້, ໃນວັນບຸນປີໃໝ່ທີ່ຊົນເຜົ່າສ່ວນໜ້ອຍຕ່າງໆຊຶ່ງລວມທັງເຜົ່າໄທລື້ຂອງແຂວງຢຸນນານແລະປະຊາຊົນໄທ, ລາວ, ກຳປູເຈຍແລະມຽນມາສະຫຼອງບຸນຫົດນ້ຳ, ເຈົ້າໜ້າທີ່ແລະນັກທຸລະກິດທີ່ມາຈາກປະເທດຕ່າງໆຂອງອາຊີຕາເວັນອອກສຽງໃຕ້ໄດ້ເຕົ້າໂຮມກັນຢູ່ບ້ານເຜົ່າໄທລື້, ເພື່ອເຂົ້າຮ່ວມກິດຈະກຳຕ່າງໆເຊັ່ນ:ການວາງສະແດງຜະລິດຕະພັນປະເພດຕ່າງໆ, ການທັດສະນະສຶກສາທາງດ້ານການຄ້າ,ການປຶກສາຫາລືແລະເຊັນສັນຍາໃນໂຄງການຕ່າງໆເປັນຕົ້ນ.
ທ່ານຄຳຫຼ້າ ລິ້ງນະສອນ, ເຈົ້າແຂວງແຂວງອຸດົມໄຊຂອງລາວທີ່ມີຊາຍແດນຕິດຈອດກັບກິ່ງແຂວງສິບສອງພັ່ນນາໄດ້ເຂົ້າຮ່ວມກອງປະຊຸມແລະກ່າວຢູ່ທີ່ປະຊຸມວ່າ, ງານຕະຫຼາດນັດການຄ້າແລະການທ່ອງທ່ຽວເຂດຊາຍແດນສິບສອງພັ່ນນາແມ່ນເວທີທີ່ສຳຄັນຂອງປະເທດຕ່າງໆໃນການດຳເນີນການແລກປ່ຽນແລະການຄ້າ, ໂດຍສະເພາະເວົ້າສຳລັບປະເທດລາວທີ່ເປັນປະເທດໃກ້ຄຽງຂອງຈີນ, ງານຕະຫຼາດນັດໃນທຸກປີລ້ວນແຕ່ແມ່ນໂອກາດທີ່ສຳຄັນເທື່ອໜຶ່ງໃນການຊຸກຍູ້ການແລກປ່ຽນດ້ານການຄ້າລະຫວ່າງລາວ-ຈີນ. ທ່ານກ່າວວ່າ, ຄຽງຄູ່ກັບການພົວພັນລະຫວ່າງລາວ-ຈີນນັບມື້ນັບແໜ້ນແຟ້ນຍິ່ງໆຂຶ້ນ, ໃນຊຸມປີຜ່ານມາ ນັກທຸລະກິດແລະວິສາຫະກິດຂອງລາວທີ່ໄປເຂົ້າຮ່ວມງານວາງສະແດງກໍ່ນັບມື້ນັບຫຼາຍຂຶ້ນ, ທ່ານຫວັງຢາກໃຫ້ງານຕະຫຼາດນັດການຄ້າແລະການທ່ອງທ່ຽວເຂດຊາຍແດນສາມາດສືບຕໍ່ຂະຫຍາຍກວ້າງອອກໃນອະນາຄົດ, ເພື່ອຕອບສະໜອງຄວາມຕ້ອງການຂອງລາວ.
ຢູ່ເຂດວາງສະແດງຂອງລາວຢູ່ໃນຫໍວາງສະແດງອາຊຽນ, ທ່ານຄຳຫຼ້າ ລິ້ງນະສອນ ເຈົ້າແຂວງແຂວງອຸດົມໄຊຂອງລາວໄດ້ເຫັນບໍລິສັດເຟີນີເຈີທີ່ຄົນລາວແລະຄົນຈີນຮ່ວມທຶນແຫ່ງໜຶ່ງ. ຜູ້ຮັບຜິດຊອບຝ່າຍລາວຂອງບໍລິສັດແຫ່ງນີ້ກໍ່ກ່າວວ່າ, ນັບແຕ່ບໍລິສັດສ້າງຕັ້ງຂຶ້ນເປັນເວລາ 7 ປີຜ່ານມານີ້, ປີນີ້ແມ່ນປີທີ 5 ແລ້ວທີ່ບໍລິສັດຕົນມາເຂົ້າຮ່ວມງານວາງສະແດງຄັ້ງນີ້, ມາເທື່ອໃດກໍ່ຂາຍໄດ້ດີກວ່າຄັ້ງຜ່ານມາ. ທ່ານເຫັນວ່າ, ນີ້ແມ່ນຍ້ອນໄດ້ຮັບຜົນປະໂຫຍດຈາກການພົວພັນທີ່ນັບມື້ນັບດີຂຶ້ນກວ່າເກົ່າແລະການຮ່ວມມືນັບມື້ນັບແໜ້ນແຟ້ນຍິ່ງຂຶ້ນລະຫວ່າງຈີນ-ລາວ. ທ່ານເຊື່ອວ່າ, ໃນອະນາຄົດ ວິສາຫະກິດຕົນກໍ່ຈະສາມາດໄດ້ຮັບຜົນປະໂຫຍດຈາກການຮ່ວມມືທີ່ມີໄມຕີຈິດມິດຕະພາບລະຫວ່າງສອງປະເທດ, ແລະຈະພັດທະນາເຕີບໃຫຍ່ຢ່າງບໍ່ຢຸດຢັ້ງ.
 |
