ວັນທີ 24 ເມສານີ້ ໃນກອງປະຊຸມຂ່າວຮ່ວມກັບທ່ານບາຣັກ ໂອບາມາ ປະທານາທິບໍດີອາເມລິກາທີ່ໄປຢ້ຽມຢາມ, ທ່ານຊິນໂຈ ອາເບ ນາຍົກລັດຖະມົນຕີ ຍີ່ປຸ່ນກ່າວວ່າ, ສອງປະເທດຍີ່ປຸ່ນແລະອາເມລິກາເຫັນດີສືບຕໍ່ດຳເນີນການເຈລະຈາຂັ້ນລັດຖະມົນຕີກ່ຽວກັບສັນຍາເພື່ອນມິດເສດຖະກິດມະຫາສະໝຸດປາຊີຟິກ ຫຼື TPP ຄືນໃໝ່, ແລະພະຍາຍາມແກ້ໄຂຄວາມຂັດແຍ້ງກັນກ່ຽວກັບບັນຫາທີ່ສຳຄັນແລະບັນລຸການເຊັນສັນຍາໂດຍໄວເທົ່າທີ່ຈະໄວໄດ້.
ຍ້ອນວ່າຍີ່ປຸ່ນແລະອາເມລິກາຍັງບໍ່ທັນໄດ້ເຊັນສັນຍາກ່ຽວກັບການເຈລະຈາ TPP ເທື່ອ, ສະນັ້ນ ສອງປະເທດຈຶ່ງບໍ່ສາມາດອອກຖະແຫຼງການຮ່ວມໄດ້ຕາມເວລາທີ່ກຳນົດໄວ້ພາຍຫຼັງການພົບປະກັນລະຫວ່າງປະມຸກລັດສອງປະເທດແລ້ວ. ຕໍ່ເລື່ອງນີ້ ທ່ານຊິນໂຈ ອາເບກ່າວວ່າ, ຜູ້ຕາງໜ້າການເຈລະຈາດ້ານການຄ້າຂອງຍີ່ປຸ່ນແລະອາເມລິກາຈະສືບຕໍ່ປຶກສາຫາລືກັນກ່ຽວກັບບັນຫາທີ່ບໍ່ທັນໄດ້ແກ້ໄຂໃນການເຈລະຈາສັນຍາ TPP ໃນຕອນຄ່ຳວັນທີ 24 ເມສານີ້, ແລະມີແຜນຈະອອກຖະແຫຼງການຮ່ວມພາຍຫຼັງ "ໄດ້ຮັບຂໍ້ສະຫຼຸບແລ້ວ". ທ່ານກ່າວວ່າ, ຈະຮ່ວມກັບທ່ານໂອບາມາຊຸກຍູ້ເຈົ້າໜ້າທີ່ຂອງສອງປະເທດດຳເນີນການເຈລະຈາດ້ານການຄ້າລະຫວ່າງສອງຝ່າຍໃຫ້ໄວຂຶ້ນກວ່າເກົ່າ.