ທ່ານສີຈິ້ນຜິງເຂົ້າຮ່ວມກອງປະຊຸມສົນທະນາລະຫວ່າງຜູ້ນຳຂອງປະເທດບຣິກສ໌ກັບປະເທດອາເມລິກາໃຕ້
ກອງປະຊຸມສົນທະນາລະຫວ່າງຜູ້ນຳຂອງປະເທດບຣິກສ໌ກັບປະເທດອາເມລິກາໃຕ້ໄດ້ຈັດຂຶ້ນຢູ່ເບຼຊີເລຍແຫ່ງເບຼຊິນໃນວັນທີ 16 ກໍລະກົດນີ້. ທ່ານສີຈິ້ນຜິງ, ປະທານປະເທດຈີນ, ທ່ານນາງດີວມາ ໂຣເຊັຟ, ປະທານາທິບໍດີເບຼຊິນ, ທ່ານວລາດີເມຍ ປູຕິນ, ປະທານາທິບໍດີຣັດເຊຍ, ທ່ານນາເຣັນດຣາ ໂມດີ, ນາຍົກລັດຖະມົນຕີອິນເດຍ, ທ່ານຈາໂຄບ ຈູມາ, ປະທານາທິບໍດີອາຟຣິກາໃຕ້ພ້ອມດ້ວຍຜູ້ນຳຂອງປະເທດອາເມລິກາໃຕ້ຄື: ທ່ານດີຊີຣີ ດີລາໂນ ບຸນເທີຊີ, ປະທານາທິບໍດີຊູຣີນາມ, ທ່ານນາງຄຣິຕີນາ ເຟີນານດີສ໌ ດີ ຄີຊີເນ, ປະທານາທິບໍດີອາກຊັງຕິນ, ທ່ານອິໂອ ໂມຣາລິສ, ປະທານາທິບໍດີໂບລີວີ, ທ່ານຈູອານ ມານເອວ ຊານໂຕສ໌, ປະທານາທິບໍດີໂກລົມບີ, ທ່ານມາຍໂຄລີ ບາຊີລິດ, ປະທານາທິບໍດີຈີເລ, ທ່ານເຟີນານເດີສ໌ ໂຄເຣຍ, ປະທານາທິບໍດີເອກວາດໍ, ທ່ານໂດນາດ ຣາໂມຕາ, ປະທານາທິບໍດີກູຍຢານາ, ທ່ານໂຮຣາຊີວ ຄາເທີສຸ, ປະທານາທິບໍດີບາຣາໄກວ, ທ່ານໂອລານຕາ ໂມຊີສ໌ ຮູມາລາ ຕາສໂຊ, ປະທານາທິບໍດີເປຣູ, ທ່ານຈອດສ໌ ມູຈີຄາ, ປະທານາທິບໍດີອູຣູໄກວ, ທ່ານນີໂຄລັສ ມາດີໂຣ, ປະທານາທິບໍດີເວເນຊູເອລາໄດ້ຮ່ວມກັນເຂົ້າຮ່ວມກອງປະຊຸມ.
ຜູ້ນຳຂອງປະເທດຕ່າງໆທີ່ເຂົ້າຮ່ວມກອງປະຊຸມໄດ້ດຳເນີນການປຶກສາຫາລືໂດຍປິ່ນອ້ອມແຜນການກ່ຽວກັບການແກ້ໄຂບັນຫາແບບຍືນຍົງທີ່ມີການເຕີບໂຕແບບລວບລວມ, ຮ່ວມກັນປຶກສາຫາລືກ່ຽວກັບການເພີ່ມທະວີການຮ່ວມມືລະຫວ່າງປະເທດບຣິກສ໌ກັບປະເທດອາເມລິກາໃຕ້.
ທ່ານສີຈິ້ນຜິງກ່າວເນັ້ນວ່າ, ຈີນແລະອາເມລິກາໃຕ້ມີປະຫວັດການໄປມາຫາສູ່ກັນທີ່ເປັນມູນເຊື້ອມາແຕ່ບູຮານນະການ, ປະເທດອາເມລິກາໃຕ້ກໍ່ແມ່ນໜຶ່ງໃນທິດທາງທີ່ສຳຄັນຂອງການຮ່ວມມືລະຫວ່າງຈີນກັບປະເທດທີ່ພວມພັດທະນາ, ພວກຂ້າພະເຈົ້າຍິນດີສືບຕໍ່ເປັນເພື່ອນມິດທີ່ດີແລະຄູ່ຮ່ວມທີ່ດີກັບບັນດາປະເທດ, ຮ່ວມກັນຊຸກຍູ້ການຮ່ວມມືໂດຍລວມລະຫວ່າງຈີນ-ອາເມລິກາລາຕິນ.