ວັນທີ 19 ກໍລະກົດນີ້, ກອງປະຊຸມລັດຖະມົນຕີກ່ຽວກັບການຮ່ວມມືດ້ານເສດຖະກິດ ແລະ ການສົນທະນາປະສານງານຍຸດທະສາດຄັ້ງປະຖົມມະເລີກລະຫວ່າງຈີນ ກັບ ອາກຊັງຕິນໄດ້ຈັດຂຶ້ນຢູ່ນະຄອນຫຼວງບຸຍເອນົສອາຍເລັສຂອງອາກຊັງຕິນ. ທ່ານສີຈາວເສີ ຫົວໜ້າຄະນະກຳມະການພັດທະນາແລະປະຕິຮູບແຫ່ງລັດຈີນ, ທ່ານຈໍຈ ກາປີທານີຊີ ຫົວໜ້າລັດຖະມົນຕີຂອງຄະນະລັດຖະບານອາກຊັງຕິນ,ທ່ານລັດຖະມົນຕີວ່າການກະຊວງການຕ່າງປະເທດອາກຊັງຕິນ ພ້ອມທັງພາກສ່ວນລັດຖະບານ, ອົງການການເງິນທີ່ກ່ຽວຂ້ອງ ແລະ ຜູ້ຕາງໜ້າວິສາຫະກິດສອງປະເທດ 80 ກວ່າຄົນໄດ້ເຂົ້າຮ່ວມກອງປະຊຸມ, ແລະໄດ້ດຳເນີນການແລກປ່ຽນຄວາມຄິດຄວາມເຫັນຢ່າງກວ້າງຂວາງ ແລະ ເລິກເຊິ່ງໃນຫົວຂໍ້ 3 ດ້ານ,ຄື, ສະຖານະການ ແລະ ນະໂຍບາຍເສດຖະກິດມະຫາພາກ, ນະໂຍບາຍການລົງທຶນຂອງສອງປະເທດ ພ້ອມທັງການຮ່ວມມືທີ່ຕິດແທດຕົວຈິງລະຫວ່າງຈີນ ກັບ ອາກຊັງຕິນ.
ໃນເວລາກ່າວຄຳປາໄສ, ທ່ານສີຈາວເສີກ່າວວ່າ, ການສົນທະນາເທື່ອນີ້ຈັດຂຶ້ນໃນໄລຍະທ່ານປະທານສີຈີ້ນຜີງຢ້ຽມຢາມອາກຊັງຕິນ, ມີຄວາມໝາຍສຳຄັນຫຼາຍ. ສອງຝ່າຍຜ່ານຈາກການສົນທະນາ, ມາເພິ່ມທະວີການພົວພັນດ້ານຍຸດທະສາດ ແລະ ການແລກປ່ຽນດ້ານນະໂຍບາຍ, ຊຸກຍູ້ການປະຕິບັດໂຄງການສຳຄັນໃນຂົງເຂດອັນສຳຄັນ, ໄດ້ຊຸກຍູ້ການຮ່ວມມືທີ່ຕິດແທດຕົວຈິງລະຫວ່າງຈີນ ກັບ ອາກຊັງຕິນໃນຂົງເຂດອັນກວ້າງຂວາງ ແລະ ລະດັບອັນເລິກເຊິ່ງ, ຈະເພີ່ມພະລັງແຮງໃໝ່ໃຫ້ແກ່ການຂະຫຍາຍການພົວພັນຈີນ-ອາຊັງຕິນ.
ລັດຖະມົນຕີ ແລະ ຜູ້ຕາງໜ້າຂອງອາກຊັງຕິນທີ່ຮ່ວມປະຊຸມກ່າວວ່າ, ລັດຖະບານອາກຊັງຕິນເອົາໃຈໃສ່ໃນລະດັບສູງນຳການຈັດກອງປະຊຸມກ່ຽວກັບການຮ່ວມມືດ້ານເສດຖະກິດ ແລະ ການສົນທະນາປະສານງານຍຸດທະສາດຄັ້ງປະຖົມມະເລີກ, ເຊື່ອວ່າການສົນທະນາເທື່ອນີ້ຈະເພີ່ມທະວີຄວາມເຂົ້າໃຈ ແລະ ຄວາມໄວ້ເນື້ອເຊື່ອໃຈກັນລະຫວ່າງສອງຝ່າຍຕື່ມອີກ, ຊຸກຍູ້ການຮ່ວມມືທີ່ຕິດແທດຕົວຈິງລະຫວ່າງສອງຝ່າຍ ແລະ ການຂະຫຍາຍການພົວພັນລະຫວ່າງສອງຝ່າຍ, ສ້າງຈຸດສຸມໃໝ່ໃນການຂະຫຍາຍການພົວພັນຄູ່ຍຸດທະສາດຮອບດ້ານລະຫວ່າງຈີນ ກັບ ອາກຊັງຕິນ.