ທະນາຄານກາງຈີນແລະສວິສເຊັນສັນຍາວ່າດ້ວຍການແລກປ່ຽນສະກຸນເງິນຕາລະຫວ່າງສອງປະເທດ

ທະນາຄານກາງຈີນແຈ້ງໃຫ້ຊາບວ່າ, ໂດຍໄດ້ຮັບການອະນຸມັດຈາກລັດຖະບານຈີນ, ວັນທີ 21 ກໍລະກົດນີ້, ທະນາຄານປະຊາຊົນຈີນແລະທະນາຄານແຫ່ງຊາດສວິສໄດ້ລົງນາມໃນສັນຍາວ່າດ້ວຍການແລກປ່ຽນສະກຸນເງິນຕາລະຫວ່າງສອງປະເທດໃນມູນຄ່າ 150 ຕື້ຢວນແລະ21 ຕື້ຝຣັງສວິສ, ເຊິ່ງມີຈຸດປະສົງເພື່ອໃຫ້ການສະໜັບສະໜູນດ້ານສະພາບຄ່ອງຂອງເງິນຕາໃຫ້ແກ່ການພົວພັນດ້ານເສດຖະກິດການຄ້າລະຫວ່າງສອງຝ່າຍ, ແລະປົກປັກຮັກສາຄວາມໝັ້ນຄົງຂອງຕະຫຼາດການເງິນ. ສັນຍາສະບັບນີ້ມີອາຍຸການ 3 ປີ, ແລະສາມາດຕໍ່ເວລາກຳນົດໄດ້ເມື່ອໄດ້ຮັບຄວາມເຫັນດີຈາກສອງຝ່າຍ.

ທະນາຄານກາງຈີນກ່າວວ່າ, ການເຊັນສັນຍາແລກປ່ຽນສະກຸນເງິນຕາລະຫວ່າງສອງປະເທດ ເປັນຂີດໝາຍສະແດງໃຫ້ເຫັນວ່າ, ການຮ່ວມມືລະຫວ່າງສອງຝ່າຍຈີນ-ສວິສໃນຂົງເຂດການເງິນດ້ານເງິນຕາໄດ້ຮັບຄວາມຄືບໜ້າໃໝ່, ແລະມີຜົນດີຕໍ່ການຊຸກຍູ້ການຄ້າແລະການລົງທຶນຂອງສອງປະເທດໃຫ້ມີຄວາມສະດວກຫຼາຍຂຶ້ນ, ແລະຍັງສາມາດໃຫ້ການສະໜັບສະໜູນດ້ານສະພາບຄ່ອງແກ່ຕະຫຼາດເງິນຢວນຢູ່ສວິສໃຫ້ມີການພັດທະນາຂຶ້ນຕື່ມອີກ, ທັງເປັນການສົ່ງເສີມການນຳໃຊ້ເງິນຢວນຢູ່ນອກປະເທດຈີນ.