ຕາມຂ່າວຕ່າງປະເທດທີ່ລາຍງານໃນວັນທີ 21 ກໍລະກົດນີ້, ເຈົ້າໜ້າທີ່ສະໜາມບິນເລີແກໃຫ້ຮູ້ວ່າ, ທ່ານບານກີມູນ ເລຂາທິການໃຫຍ່ອົງການສະຫະປະຊາຊາດໄດ້ເດີນທາງໄປເຖິງນະຄອນຫຼວງເລີແກຂອງເກັຣກເພື່ອຈະໄກ່ເກ່ຍໃຫ້ປາແລັສຕິນກັບອິສຣາແອນຢຸດຍິງຢູ່ເຂດກາຊາ. ນອກນີ້, ທ່ານຈອນ ເຄີຣີ ລັດຖະມົນຕີການຕ່າງປະເທດອາເມລິກາ ກໍ່ຈະເດີນທາງໄປນະຄອນຫຼວງເລີແກຂອງເກັຣກໃນວັນທີ 21 ກໍລະກົດນີ້ເຊັ່ນກັນເພື່ອປຶກສາຫາລືກັບເຈົ້າໜ້າທີ່ທີ່ກ່ຽວຂ້ອງກ່ຽວກັບການປະທະກັນລະຫວ່າງປາແລັສຕິນກັບອິສຣາແອນ.
ວັນທີ 20 ກໍລະກົດນີ້, ທ່ານບານກີມູນໄດ້ອອກຖະແຫຼງການຢູ່ກາຕາ ເຊິ່ງເປັນປະເທດທຳອິດໃນການດຳເນີນການທູດແບບສອດກະສວຍ(shuttle diplomacy), ໂດຍໄດ້ກ່າວປະນາມ ອິສຣາແອນທີ່ບຸກໂຈມຕີທາງພາກພື້ນດິນທີ່ເຮັດໃຫ້ປະຊາຊົນຜູ້ບໍລິສຸດເສຍຊີວິດແລະບາດເຈັບ. ທ່ານກ່າວເນັ້ນວ່າ, ອິສຣາແອນຕ້ອງຮັກສາຄວາມອົດທົນຈົນສຸດຄວາມສາມາດເພື່ອປົກປັກຮັກສາປະຊາຊົນຜູ້ບໍລິສຸດ.
ໃນການປະທະກັນລະຫວ່າງປາແລັສຕິນກັບອິສຣາແອນທີ່ຍືດເຍື້ອມາເປັນເວລາເກືອບເຄິ່ງເດືອນໄດ້ເຂົ້າສູ່ວັນອາທິດທີ່ນອງເລືອດທີ່ສຸດໃນວັນທີ 20 ກໍລະກົດນີ້, ໃນວັນດຽວກັນມີຜູ້ເສຍຊີວິດຫຼາຍກວ່າຮ້ອຍຄົນ, ເຊິ່ງສະຖານະການມີຄວາມເຄັ່ງຕຶງທີ່ສຸດ.