ວັນທີ 24 ກໍລະກົດນີ້ ຢູ່ເກາະເທີເຊຣາຂອງປອກຕຸຍການ, ທ່ານສີຈິ້ນຜິງ ປະທານປະເທດຈີນໄດ້ຕ້ອນຮັບການເຂົ້າຢ້ຽມຄຳນັບຂອງທ່ານປາວໂລ ໂປທັສ ຮອງນາຍົກລັດຖະມົນຕີ ທັງເປັນຜູ້ຕາງໜ້າຂອງປະທານາທິບໍດີປອກຕຸຍການ.
ໂອກາດນີ້ ທ່ານສີຈິ້ນຜິງຊີ້ອອກວ່າ, ຜ່ານການເຈລະຈາກັນ, ຈີນກັບປອກຕຸຍການໄດ້ມອບຮັບອຳນາດການປົກຄອງຂອງມາເກົ໋າຢ່າງສະດວກ. ຫຼັງຈາກມາເກົ໋າກັບຄືນສູ່ປະເທດຈີນເປັນຕົ້ນມາ, ໄດ້ຮັກສາຄວາມຈະເລີນຮຸ່ງເຮືອງແລະສະເຖຍລະພາບ. ຄວາມເປັນຈິງພິສູດໃຫ້ເຫັນວ່າ, ເວລານັ້ນ ຈີນແລະປອກຕຸຍການໄດ້ມີການຕັດສິນນະໂຍບາຍທີ່ຖືກຕ້ອງໃນປະຫວັດສາດ.
ທ່ານສີຈິ້ນຜິງຍັງໄດ້ແຈ້ງສະພາບການກ່ຽວກັບທ່ານເຂົ້າຮ່ວມການພົບປະຂອງຜູ້ນຳປະເທດບຣິກສ໌ຄັ້ງທີ 6 ແລະຢ້ຽມຢາມ 4 ປະເທດອາເມລິກາລາຕິນ, ແລະກ່າວເນັ້ນວ່າ, ຈີນຍິນດີຮ່ວມກັບປອກຕຸຍການ, ພ້ອມທັງເສີມຂະຫຍາຍບົດບາດຂອງເວທີປຶກສາຫາລືການຮ່ວມມືທາງເສດຖະກິດການຄ້າຈີນ-ປະເທດທີ່ເວົ້າພາສາປອກຕຸຍການ, ບົນພື້ນຖານທີ່ສະເໜີພາບກັນຕ່າງຝ່າຍຕ່າງມີຜົນປະໂຫຍດ, ຕັ້ງໜ້າດຳເນີນການຮ່ວມມືລະຫວ່າງສາມຝ່າຍ, ເພື່ອປະກອບສ່ວນເຂົ້າໃນການຊຸກຍູ້ສັນຕິພາບ, ສະເຖຍລະພາບ ແລະ ການພັດທະນາຂອງພາກພື້ນແລະປະເທດທີ່ກ່ຽວຂ້ອງ.
ທ່ານໂປທັສກ່າວວ່າ, ປອກຕຸຍການຍິນດີຂະຫຍາຍການພົວພັນຄູ່ຮ່ວມຍຸດທະສາດຮອບດ້ານກັບຈີນ, ເພີ່ມທະວີການສົນທະນາດ້ານການເມືອງ, ເປີດກວ້າງການຮ່ວມມືໃນຂົງເຂດເສດຖະກິດການຄ້າ, ການລົງທຶນ, ທະເລ ແລະການທ່ອງທ່ຽວເປັນຕົ້ນ.
ທ່ານສີຈິ້ນຜິງແມ່ນແວ່ພັກຢູ່ເກາະເທີເຊຣາຂອງປອກຕຸຍການລະຫວ່າງການເດີນທາງກັບຄືນສູ່ປະເທດພາຍຫຼັງສິ້ນສຸດການຢ້ຽມຢາມກູບາທາງລັດຖະກິດ.
