ວັນທີ 26 ສິງຫານີ້, ພາຍໃຕ້ການໄກ່ເກ່ຍຂອງເອຢິບແລະຝ່າຍອື່ນໆ, ປາແລັສຕິນແລະອິສຣາແອນໄດ້ບັນລຸສັນຍາວ່າດ້ວຍການຢຸດຍິງໄລຍະຍາວ; ອົງການສະຫະປະຊາຊາດໄດ້ສະແດງຄວາມຊົມເຊີຍຕໍ່ກັບເລື່ອງນີ້, ພ້ອມທັງຮຽກຮ້ອງໃຫ້ສອງຝ່າຍຟື້ນຟູການເຈລະຈາທາງການເມືອງໃນທັນທີ.
ມື້ດຽວກັນ, ທ່ານບັນກີມູນ, ເລຂາທິການໃຫຍ່ອົງການສະຫະປະຊາຊາດໄດ້ອອກຖະແຫຼງການສະບັບໜຶ່ງໂດຍສະແດງຄວາມຊົມເຊີຍຕໍ່ປາແລັສຕິນແລະອິສຣາແອນທີ່ໄດ້ປະກາດບັນລຸການຢຸດຍິງທີ່ບໍ່ຈຳກັດເວລາຢູ່ເຂດກາຊາ. ທ່ານບັນກີມູນຍັງກ່າວວ່າ, ທ່ານຫວັງວ່າສັນຍາວ່າດ້ວຍການຢຸດຍິງສະບັບດັ່ງກ່າວຈະສາມາດເປັນການເລີ່ມຕົ້ນຂະບວນການທາງການເມືອງ, ບັນລຸສັນຕິພາບແບບຍາວນານລະຫວ່າງປາແລັສຕິນ - ອິສຣາແອນ. ທ່ານບັນກີມູນໄດ້ຮຽກຮ້ອງໃຫ້ປາແລັສຕິນແລະອິສຣາແອນກັບສູ່ໂຕະຂອງການເຈລະຈາລະຫວ່າງສອງຝ່າຍ, ບັນລຸສັນຍາກ່ຽວກັບບັນຫາຖານະສຸດທ້າຍ.
ຕາມສະຖິຕິຈາກຝ່າຍປາແລັສຕິນ, ໃນການປະທະກັນທີ່ເກີດຂຶ້ນປະມານ 1 ເດືອນກວ່າຜ່ານມາໄດ້ເຮັດໃຫ້ຝ່າຍປາແລັສຕິນ 2.124 ຄົນເສຍຊີວິດ, 1 ໝື່ນກວ່າຄົນບາດເຈັບ. ສ່ວນຝ່າຍອິສຣາແອນກໍ່ມີ 69 ຄົນເສຍຊີວິດ.