ຕອນເຊົ້າວັນທີ 15 ກັນຍານີ້, ເວທີປຶກສາຫາລືວັດທະນະທຳຈີນ-ອາຊຽນຄັ້ງທີ 9 ໄດ້ໄຂຂຶ້ນຢູ່ນະຄອນນານນິງ ເຂດປົກຄອງຕົນເອງເຜົ່າຈ້ວງກວາງຊີຈີນ, ໃນກອງປະຊຸມດັ່ງກ່າວ,ຜູ້ແທນຈາກຈີນແລະ 10 ປະເທດອາຊຽນໄດ້ດຳເນີນການປຶກສາຫາລືກັນກ່ຽວກັບການຄຸ້ມຄອງແລະການຈັດກິດຈະກຳຕົວຈິງຂອງເທດສະການສິລະປະລະດັບສາກົນ.
ເວທີປຶກສາຫາລືວັດທະນະທຳຄັ້ງນີ້ເປັນໜຶ່ງໃນເວທີປຶກສາຫາລືຫົວຂໍ້ນ້ອຍຕ່າງໆໃນຂອບງານວາງສະແດງສິນຄ້າຈີນ-ອາຊຽນຄັ້ງທີ 11, ແລະກໍແມ່ນໂຄງການສຳຄັນຂອງປີແລກປ່ຽນວັດທະນະທຳຈີນ-ອາຊຽນ 2014. ທ່ານຫຼິວຢູຈູ່ ຜູ້ຊ່ວຍລັດຖະມົນຕີວ່າການກະຊວງວັດທະນະທຳຈີນໄດ້ກ່າວໃນພິທີເປີດເວທີປຶກສາຫາລືວ່າ, ເວທີປຶກສາຫາລືມີຫົວຂໍ້ວ່າ "ເທດສະການສິລະປະລະດັບສາກົນ", ເຊິ່ງມີຈຸດປະສົງເພື່ອເຮັດໃຫ້ຈີນແລະອາຊຽນຮ່ວມກັນຊົມໃຊ້ຂໍ້ມູນຂ່າວສານຂອງເທດສະການສິລະປະລະດັບສາກົນ ແລະແລກປ່ຽນບົດຮຽນເຊິ່ງກັນແລະກັນກ່ຽວກັບການຈັດເທດສະການດັ່ງກ່າວ.