ຕອນເຊົ້າວັນທີ 16 ກັນຍານີ້, ຢູ່ທີ່ພິທີເປີດງານວາງສະແດງສິນຄ້າຈີນ-ອາຊຽນຄັ້ງທີ 11 ທີ່ຈັດຂຶ້ນຢູ່ນະຄອນນານນິງ ເຂດປົກຄອງຕົນເອງເຜົ່າຈ້ວງກວາງຊີຂອງຈີນ, ທ່ານຮຸນແຊນ ນາຍົກລັດຖະມົນຕີກຳປູເຈຍກ່າວວ່າ, ຢູ່ບົນພື້ນຖານສາຍພົວພັນຄູ່ຮ່ວມມືຍຸດທະສາດຈີນ-ອາຊຽນ,ການເຈລະຈາກ່ຽວກັບສາຍພົວພັນຄູ່ຮ່ວມເສດຖະກິດຮອບດ້ານຂອງພາກພື້ນ(RCEP)ຢູ່ໃນຂອບເຂດການຄ້າເສລີຈີນ-ອາຊຽນຈະກາຍເປັນແບບຢ່າງທີ່ໝັ້ນຄົງອີກອັນໜຶ່ງເພື່ອສະໜັບສະໜູນການພັດທະນາຂອງພາກພື້ນ, ແລະຊຸກຍູ້ການຮ່ວມມືລະຫວ່າງຈີນກັບອາຊຽນ, ປະກອບສ່ວນເຂົ້າໃນການສ້າງຄວາມເຕີບໂຕດ້ານເສດຖະກິດຂອງອາຊີກໍຄືຂອງໂລກ.
ທ່ານຮຸນແຊນກ່າວວ່າ, ເຖິງວ່າພາຍໃນພາກພື້ນໄດ້ປະສົບສະຖານະພາບທາງດ້ານເສດຖະກິດແລະການເມືອງທີ່ມີການປ່ຽນແປງຢ່າງບໍ່ຢຸດຢັ້ງກໍຕາມ, ແຕ່ການຮ່ວມມືລະຫວ່າງຈີນກັບອາຊຽນໄດ້ມີການພັດທະນາຢ່າງວ່ອງໄວ ໂດຍສະເພາະເຂດການຄ້າເສລີຈີນ-ອາຊຽນໄດ້ສ້າງສຳເລັດເມື່ອປີ 2010 ເຊິ່ງໄດ້ປະກອບສ່ວນຢ່າງໃຫຍ່ຫຼວງເຂົ້າໃນການຊຸກຍູ້ການປະຕິບັດມາດຕະການທີ່ກ່ຽວຂ້ອງຂອງເຂດການຄ້າເສລີ.